பௌலர்கள் ஜாக்கிரதை!
ஸ்டார் பர்ஃபாமர்களைக் களமிறக்கிக்கொண்டே இருக்கிறது இந்த உலகக் கோப்பை.
ரோஹித் ஷர்மா, ஷகிப் அல் ஹசன், மிட்செல் ஸ்டார்க் போன்ற சீனியர்கள் மேட்ச் வின்னர்களாக ஜொலிக்க, நிகோலஸ் பூரன், அவிஷ்கா ஃபெர்னாண்டோ, ஷாஹீன் அஃப்ரிடி, அலெக்ஸ் கேரி போன்ற இளரத்தங்களும் பயமின்றிப் பட்டையைக் கிளப்புகிறார்கள்.
லீக் போட்டிகள் முடிவடைந்த கடைசி வாரம், அதிகம் பேரைக் கவர்ந்த இருவர் ஆப்கானிஸ்தான் வீரர் இக்ரம் அலிகில், பாகிஸ்தான் பந்துவீச்சாளர் ஷாஹீன் அஃப்ரிடி. ஆப்கானிஸ் தானின் உலகக் கோப்பை 9 தோல்வி களுடன் மிக மோசமாக முடிவுக்கு வர, கடைசிப் போட்டியில் நம்பிக்கை பாய்ச்சினார் 18 வயது இளம் விக்கெட் கீப்பர் பேட்ஸ்மேன் இக்ரம்.
தொடக்கப் போட்டிகளில் அவரை பேட்ஸ் மேனாகவே மதிக்காமல், 8 மற்றும் 9-வது இடங்களில் களமிறக்கியது அந்த அணி நிர்வாகம். வெஸ்ட் இண்டீஸ் அணியுடனான போட்டியில், 311 ரன்களை சேஸ் செய்யும்போது மூன்றாவது வீரராகக் களமிறக்கப்பட்டார் இக்ரம். புல் ஷாட், டிரைவ் என எல்லா ஷாட்களையும் சிறப்பாக ஆடி அதிரடி காட்டியவர் 86 ரன்கள் அடித்து அசத்தினார். சதமடித்திருந்தால், உலகக் கோப்பை வரலாற்றில் சதமடித்த இளம் வீரர் என்ற மகத்தான சாதனையைப் படைத்திருப்பார். இல்லையென்றாலும், ஆப்கானிஸ்தான் கிரிக்கெட் எதிர்காலத்துக்கு மிகமுக்கிய நம்பிக்கையாக உருவெடுத்துள்ளார்.
அடுத்து ஷாஹீன் அஃப்ரிடி. ஆரம்பப் போட்டிகளில் ஒன்றுமே செய்யாத ஹசன் அலிக்கு வாய்ப்பு கொடுத்துவிட்டு, இவரை பெஞ்சில் அமர்த்தியது பாகிஸ்தான் அணி நிர்வாகம். ஆனால், வாய்ப்பு கிடைத்தபோது அதை கெட்டியாகப் பிடித்துக்கொண்டது இந்த 19 வயது அதிவேகப்புயல். 5 போட்டிகளில் 16 விக்கெட்டுகள், 2 முறை 4 விக்கெட், ஒருமுறை 6 விக்கெட். முகமது ஆமிரை மட்டுமே நம்பியிருந்த பாகிஸ்தான் அணிக்கு ‘நான் இருக்கேன்’ என பூஸ்ட் கொடுத்தார். தன் வேகத்தாலும், வேரியேஷனாலும் அனைவரையும் மிரட்டினார். பாகிஸ்தானின் புகழ்பெற்ற இடது கை வேகப்பந்துவீச்சாளர்கள் வரிசையில் தன் பெயரை அழுத்தமாகப் பதித்திருக்கிறார் அஃப்ரிடி!
ஹிட்மேன்தான் இந்த உலகக் கோப்பையின் சூப்பர் மேன். லீக் சுற்றின் முடிவிலேயே ஐந்து சதம், ஒரு அரைசதம். பிரேக் இல்லாத பென்ஸ் கார்போல் பாய்ந்துகொண்டிருக்கிறார் ரோஹித். வழக்கமாக, நிதானமாக ஆட்டத்தைத் தொடங்கிவிட்டு, சதமடிக்கும்போதுதான் அதிரடி காட்டுவார். ஆனால், இம்முறை முதல் ஓவரிலிருந்தே வெளுக்கத் தொடங்கிவிட்டார். எதிரணி பௌலர்களைப் போல், ரோஹித் ரசிகர்களுக்கே இது ஷாக்தான். வழக்கமாக ரோஹித் நிதான ஆட்டம் ஆட, தவான் அதிரடியாக ஆடுவார். ஆனால், தவான் காயமடைந்து, அந்த இடத்தில் ராகுல் வந்தது அணிக்குக் கொஞ்சம் பின்னடைவை ஏற்படுத்தியது. ராகுல், ஏற்கெனவே சற்றுத் தடுமாறிக் கொண்டிருக்கிறார். அதுமட்டுமல்லாமல் ஒருநாள் போட்டிகளில் ரோஹித்துடன் இணைந்து ஓப்பனிங் இறங்கியதில்லை. தன் முதல் உலகக் கோப்பைத் தொடரிலேயே தவானின் இடத்தை நிரப்பவேண்டும் என்ற நெருக்கடி. ராகுலின் இந்த நெருக்கடியை ரோஹித் சரிசெய்கிறார். தவானின் அதிரடி ஆட்டத்தை ரோஹித் கையில் எடுக்க, தன் ஆட்டத்தை நெருக்கடியின்றி கூலாக ஆடினார் ராகுல். தான் நன்றாக ஆடுவது மட்டுமல்லாமல், சக வீரரின் நெருக்கடியைக் குறைக்கும் விதம் தன் அணுகுமுறையை மாற்றிக்கொண்டதற்காகவே ரோஹித்தை நிறைய பாராட்டலாம்.
களத்தில்தான் சிக்ஸர்கள் பறக்கவிடுகிறார் என்று பார்த்தால், பிரஸ் மீட்டில் வேறு லெவலில் இருக்கிறார். ‘ரிஷப் பன்ட் நாலாவதா இறங்கியிருக்காரே’ என்று கேட்டால், “நீங்கதான பன்ட் எங்க, பன்ட் எங்கன்னு கேட்டீங்க. இதோ இறங்கிட்டாரு” என்று கலாய்க்கிறார். எதிரணி பௌலர்களை மட்டுமல்ல, தனக்கெதிராக எதை வீசினாலும் அதை பெவிலியனுக்கு அனுப்பும் மோடில் இருக்கிறார் ஹிட்மேன்.
பௌலர்கள் ஜாக்கிரதை!