Published:Updated:

ரிசர்வ் ப்ளேயர் டூ ஒலிம்பியன்... கோல்ஃப் விளையாடில் சர்ப்ரைஸ் கொடுக்கும் உதயன் மானே!

உதயன் மானே
உதயன் மானே

அர்ஜென்டினாவைச் சேர்ந்த எமிலியானோ க்ரில்லோ டோக்கியோ ஒலிம்பிக்கிலிருந்து விலகுவதாக அறிவித்தார். இதனால் ரிசர்வ் வீரர்களின் பட்டியலில் முன்னிலையில் இருந்த உதயன் மானே கடைசி நேரத்தில் 60-வது வீரராக ஒலிம்பிக்கிற்கு தகுதி பெற்றார்.

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

விதி வலியது என்பது மீண்டும் ஒரு முறை நிரூபணமாகியுள்ளது. டோக்கியோ ஒலிம்பிக்கிற்கு தேர்வாக முடியாமல் வருத்தத்திலிருந்தார் கோல்ஃப் வீரர் உதயன் மானே. கடைசி நேரத்தில் அர்ஜென்டினா வீரர் எமிலியானோ க்ரில்லோ ஒலிம்பிக்கிலிருந்து விலகிவிட, உதயனுக்கு அதிர்ஷ்டம் அடித்துவிட்டது. ரிசர்வ் ப்ளேயராக இருந்தவர், இப்போது டோக்கியோ ஒலிம்பிக்கில் கோல்ஃப் போட்டியில் இந்தியா சார்பில் பங்கேற்று வருகிறார். அவர் விளையாடும் போட்டி தற்போது நடைபெற்று வருகிறது.

30 வயதாகும் உதயன் மானே சென்னையில் பிறந்து பெங்களூருவில் வளர்ந்தவர். இன்னொரு பிரபல கோல்ஃப் வீரரான அனிர்பன் லாகிரியும் இவரும் ஆரம்பக்காலத்தில் ஒன்றாகவே பயிற்சியில் ஈடுபட்டிருக்கின்றனர். அனிர்பன் லாகிரி ரியோ ஒலிம்பிக்கிலும் ஆடியிருந்தார். இப்போது டோக்கியோ ஒலிம்பிக்கிலும் பங்கேற்கிறார்.

தரவரிசை பட்டியலில் முதல் 60 இடங்களில் இருப்பவர்கள் மட்டுமே ஒலிம்பிக்கிற்கு தகுதிப்பெற முடியும் என அறிவிக்கப்பட்டது. 60 ஆளாக நூலிழையில் கடைசி இடத்தை பிடித்து அனிர்பன் லாகிரி டோக்கியோ ஒலிம்பிக்கிற்கு தகுதிப்பெற்றிருந்தார். உதயன் மானே தரவரிசையில் பின்னால் இருந்ததால் அவருக்கு வாய்ப்பு கிடைக்கவில்லை. ரிசர்வ் வீரர்கள் பட்டியலில் மட்டுமே வைக்கப்பட்டிருந்தார். இந்நிலையில்தான் அர்ஜென்டினாவைச் சேர்ந்த எமிலியானோ க்ரில்லோ டோக்கியோ ஒலிம்பிக்கிலிருந்து விலகுவதாக அறிவித்தார். இதனால் ரிசர்வ் வீரர்களின் பட்டியலில் முன்னிலையில் இருந்த உதயன் மானே கடைசி நேரத்தில் 60-வது வீரராக ஒலிம்பிக்கிற்கு தகுதிப்பெற்றார்.

கோல்ஃப் போட்டியில் ஆண்கள் பிரிவில் இந்தியாவின் பங்களிப்பே இல்லாமல் போய்விடும் சூழல் இருந்த நிலையில், கடைசி வாய்ப்பில் இரண்டு வீரர்கள் தேர்வாகி விளையாடிவருகிறார்கள்.

உதயன் மானே 2017-ல் வங்கதேச ஓபனில் 10-வது இடம் பிடித்திருந்தார். 2018-ல் இந்தோனேஷிய ஓபனில் 6-வது இடம் பிடித்திருந்தார். 2019, 2020 PGTI Players சாம்பியன்ஷிப்பை வென்றிருந்தார். இந்த ஆண்டு டெல்லியில் நடைபெற்ற NCR ஓபனையும் வென்றிருந்தார்.

அனிர்பன் லாகிரியை போன்றே உதயன் மானேவும் அனுபவமிக்க வீரரே என்பதால் இவர் மீதும் எதிர்பார்ப்புகள் இருக்கவே செய்கிறது.

உதயன் மானே
உதயன் மானே
ஒலிம்பிக் போட்டி என்ற அழுத்தத்தை எடுத்துக் கொள்ள விரும்பவில்லை. இதை இன்னொரு தொடராகவே பார்க்கிறேன். உலகளவிலான திறமைமிக்க வீரர்களுடன் ஆடுவதற்கான வாய்ப்பை சிறப்பாக பயன்படுத்திக் கொள்ள வேண்டும் என நினைக்கிறேன்.
உதயன் மானே

இப்படி தன்னடக்கமாக பேசுபவர்கள்தான் எதிர்பாராத சர்ப்ரைஸ்களை கொடுப்பார்கள். உதயன் மானே சர்ப்ரைஸ் கொடுப்பாரா?!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு