Published:Updated:

நூறாவது போட்டியில் ஆட்டநாயகன்: அசத்தல் அமித் மிஷ்ரா!

ஒட்டுமொத்த விகடனுக்கும் ஒரே ஷார்ட்கட்

Use App
நூறாவது போட்டியில் ஆட்டநாயகன்: அசத்தல் அமித் மிஷ்ரா!
நூறாவது போட்டியில் ஆட்டநாயகன்: அசத்தல் அமித் மிஷ்ரா!

நூறாவது போட்டியில் ஆட்டநாயகன்: அசத்தல் அமித் மிஷ்ரா!

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

50, 100 போன்றவை என்றுமே நமக்கு ஸ்பெஷல். ஒரு படம் நூறு நாள் ஒடுவது, 50வது பிறந்தநாள், கிரிக்கெட்டில் செஞ்சுரி என இந்த எண்கள் என்றுமே மறக்க முடியாதவை. அதுபோலத்தான் ஒரு விளையாட்டு வீரருக்கு நூறாவது போட்டி என்பது. அப்படிப்பட்ட மறக்க முடியாத போட்டியில் பறக்க முடியாத சம்பவங்கள் நடந்தால்? அப்படி டபுள் சந்தோஷத்தில் திளைக்கிறார் இந்திய சுழற்பந்து வீச்சாளர் அமித் மிஷ்ரா. ஐ.பி.எல் தொடரில் தனது நூறாவது போட்டியில், 4 விக்கெட்டுகள் வீழ்த்தி பஞ்சாப் அணியை பந்தாடி ஆட்ட நாயகன் விருது வென்றுள்ளார். அதுமட்டுமல்லாமல் ஐ.பி.எல் வரலாற்றில் அதிக விக்கெட் வீழ்த்திய சுழற்பந்துவீச்சாளர்கள் வரிசையில் முதலிடத்திற்கு முன்னேறியுள்ளார்.

நூறாவது போட்டியில் ஆட்டநாயகன்: அசத்தல் அமித் மிஷ்ரா!



ஐ.பி.எல் வரலாற்றின் வெற்றிகரமான பந்துவீச்சாளர்களில் 33 வயதான லெக்-ஸ்பின்னர் மிஷ்ராவும் ஒருவர். ஐ.பி.எல் வரலாற்றில் முதன் முதலாக மூன்று ஹாட்-டிரிக் கைப்பற்றியவர் மிஷ்ரா தான். அதையும் மூன்று வேறு அணிகளுக்காக (டேர்டெவில்ஸ், டெக்கான், சன்ரைசர்ஸ்) வீழ்த்தியுள்ளது இன்னும் சிறப்பு. ஒட்டுமொத்த மந்துவீச்சாளர்களில் 112 விக்கெட்டுகளோடு, மலிங்காவிற்கு (98 போட்டிகள் – 143 விக்கெட்) அடுத்தபடியாக சாவ்லா, ஹர்பஜனோடு இணைந்து  இரண்டாம் இடத்தில் இருந்தார் மிஷ்ரா. சாவ்லா, ஹர்பஜன் ஆகியோர் தலா 113 போட்டிகள் எடுத்துக்கொண்டாலும், மிஷ்ரா அந்த இலக்கை அடைய வெறும் 99 போட்டிகள் மட்டுமே எடுத்துக்கொண்டார். தனது அபார சுழல் திறமையால், ஃப்லோட்டிங் பால், கூக்ளி என பல ஆயுதங்கள் பயன்படுத்தி விக்கெட்டுகள் வீழ்த்தும் இவர், தனது நூறாவது போட்டியில் 4 விக்கெட்டுகள் வீழ்த்தியதன் மூலம், அதிக விக்கெட் வீழ்த்திய ஸ்பின்னர் என்ற பெருமையைப் பெற்றதோடு தனது நூறாவது போட்டியில் ஆட்டநாயகன் விருதோடு திளைத்தார் மிஷ்ரா.   

ஒன்பதாவது ஐ.பி.எல் தொடரின் 7வது போட்டியில் பஞ்சாப் மற்றும் டெல்லி அணிகள் ஃபெரோஸ் ஷா கோட்லா மைதானத்தில் மோதின. சுமாரான தொடங்கிய பஞ்சாபின் ஆட்டம், மிஷ்ரா பந்தை தொட்ட பிறகு பஞ்சரானது. நூறாவது போட்டியில் அவர் வீசிய முதல் பந்தே ஷான் மார்ஷ் ஸ்டம்பிங் செய்யப்பட்டார். அதன்பின்னர் மேக்ஸ்வெல், மில்லர் என இரு அதிரடி வீரர்களையும் அசால்டாய் வெளியேற்றினார். சில நேரம் தண்ணி காட்டிய வோஹ்ராவையும்(32 ரன்) பெவிலியனுக்கு அனுப்பி மேலும் பஞ்சாபை போட்டுத் தள்ளினார். கடைசி கட்டத்தில் வேகப்பந்துவீச்சாளர்களுக்கு ஓவர் கொடுப்பதிலேயே கேப்டன் ஜாகிர் ஆர்வம் காட்டியதால், மிஷ்ராவால் மூன்று ஓவர் மட்டுமே பந்து வீச முடிந்தது. வீசிய அந்த மூன்று ஓவர்களில் 13 பந்துகளில் எதிரணி வீரர்களால் ரன் எடுக்க முடியவில்லை. வெறும் 11 ரன் மட்டுமே விட்டுக்கொடுத்து 4 விக்கெட்டுகள் வீழ்த்தினார் அவர். பஞ்சாப் அணி 20 ஓவர்களில் 111 ரன்கள் மட்டுமே எடுக்க, டி காக்(59), சஞ்சு சாம்சன்(33) ஆகியோரின் நிதான ஆட்டத்தால் டெல்லி அணி 8 விக்கெட் வித்தியாசத்தில் வெற்றி பெற்றது. முதல் போட்டியில் கொல்கத்தாவிடம் சரண்டர் ஆன டேர்டெவில்ஸ் மீண்டு வந்திருப்பது அவர்களுக்குப் புத்துணர்ச்சியளிக்கும். பஞ்சாப் அணி தொடர்ந்து இரண்டாவது போட்டியில் தோற்றுள்ளது.

33 வயதானாலும் இன்னும் இளம் சுழற்பந்து வீச்சாளர் போலத் திறம்படவே செயல்படுகிறார் மிஷ்ரா. இந்த சிறந்த செயல்பாட்டை ஐ.பி.எல் போட்டிகளில் மட்டுமல்லாமல் இந்திய அணிக்காகவும் காட்டினால் சர்வதேச அரங்கிலும் சில சாதனைகள் படைக்கலாம்!

மு.பிரதீப் கிருஷ்ணா
மாணவர் பத்திரிகையாளர்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு