மேரி கோம்

* மணிப்பூர் மாநிலம், கங்காதேய் கிராமத்தில் 1983 மார்ச் 1-ம் தேதி பிறந்தார், மேரி கோம். தந்தை தோன்பு கோம், தாயார் சனீகம் கோம் விவசாயம் செய்துவந்தனர். ஒரு தங்கையும் தம்பியும் உள்ளனர்.

. * சிறுவயதிலேயே தடகளம், ஈட்டி எறிதல் என விளையாட்டில் ஆர்வமாக இருந்தார். 1998 ஆசிய விளையாட்டு குத்துச்சண்டை சாம்பியனான டிங்கோ சிங், இவரின் ஆதர்ஷ நாயகனாக, குத்துச்சண்டை மீது ஆர்வம் ஏற்பட்ட காரணமாக அமைந்தார்.

. * “குத்துச்சண்டையில் சாதிப்பதே எனது கனவு” எனத் தாயிடம் ஆசையை வெளிப்படுத்தியபோது மேரி கோம் வயது 13.

. * 15 வயதில், மணிப்பூர் குத்துச்சண்டை அமைப்பு பயிற்சியாளர்கள் இம்போசா, நர்ஜித்தின் கீழ்ப் பயிற்சியைத் தொடங்கினார் மேரி கோம்.

. * 2000-ம் ஆண்டு, மாநில அளவிலான குத்துச்சண்டை போட்டியில் சாம்பியன்ஷிப் பட்டம் வென்றதே, மேரி கோமின் முதல் வெற்றி. அதே ஆண்டு, தேசிய குத்துச்சண்டை சாம்பியன்ஷிப் பட்டமும் கைப்பற்றி சாதனை படைத்தார்.

. * “நீ இப்படிக் குத்துச்சண்டை போட்டுக்கொண்டிருந்தால், யார் உன்னைக் கல்யாணம் செஞ்சுக்குவா?” எனத் தந்தை கோபித்தார். மேரியின் தாய்தான் ஆதரவு கொடுத்து, ஊக்கம் அளித்தார்.

. * எதிர்ப்புகளைக் கண்டு மனம் தளராத நெனுரம்கொண்ட மேரி, குறிக்கோளை நோக்கி முன்னேறினார். 2001 உலக குத்துச்சண்டை சாம்பியன்ஷிப் போட்டிக்குத் தகுதி பெற்றார். இதில், மேரி கோம் வென்றது வெள்ளிப் பதக்கம்.

. * ‘உலக சாம்பியன்’ என்பதே மேரியின் இலக்கு. தனது அசாத்திய திறமையாலும் விடாமுயற்சியாலும் 2002 உலக சாம்பியன்ஷிப் தங்கம் வென்று, அந்த இலக்கை எட்டினார்.

. * சர்வதேச குத்துச்சண்டை அரங்கில், இந்தியாவுக்குப் பெருமைச் சேர்த்தவருக்கு 2003-ம் ஆண்டு, ‘அர்ஜூனா விருது’ அளிக்கப்பட்டது.

. * 2005-ம் ஆண்டு, கருங் ஆன்லர் என்ற கால்பந்து வீரரை, மேரி கோம் திருமணம் செய்துகொண்டார். இவர்களுக்கு மூன்று மகன்கள்.

. * திருமணத்துக்குப் பிறகு குத்துச்சண்டைக்குச் சிறிது இடைவெளிவிட்ட மேரி கோம், மீண்டும் மேடைக்குத் திரும்பினார். தாயான பிறகும், மேரியின் சாதனைகள் தொடர்ந்தன. சொல்லப்போனால், திருமணத்துக்குப் பிறகே 4 உலக சாம்பியன்ஷிப் பட்டத்தைப் பெற்றுள்ளார்.

. * இதுவரை பங்கேற்றுள்ள 7 உலக சாம்பியன்ஷிப் தொடர்களிலும் பதக்கம் வென்ற ஒரே வீராங்கனை என்ற சாதனைக்குச் சொந்தக்காரர் மேரி கோம்.

. * உலக சாம்பியன்ஷிப் குத்துச்சண்டை போட்டிகளில், இந்தியர்களில் (ஆண்கள், பெண்கள்) யாரும் 6 முறை தங்கம் வென்றதில்லை. இரு பிரிவுகளிலும் அதிகம் தங்கம் (6 முறை) வென்ற சாதனை இவர் வசமே.

. * உலக சாம்பியன்ஷிப்பில் முத்திரைப் பதித்த மேரி கோம், அடுத்ததாக ஒலிம்பிக் கனவைத் துரத்தினார். 2012 ஒலிம்பிக்கில், ‘ஃப்ளைவெயிட்’ எனப்படும் பெண்களுக்கான 51 கிலோ எடைப் பிரிவில், வெண்கலப் பதக்கம் வென்றார்.

. * “பாக்ஸிங் ஆண்களுக்கான விளையாட்டாகவே பார்க்கப்படுகிறது. இதில் பெண்களும் சாதிக்கலாம் என்பதை ஒருநாள் நிரூபிப்பேன் எனச் சபதம் கொண்டேன்; ஜெயித்தேன்” என்கிறார், இந்தியப் பெண்களின் நம்பிக்கை நாயகி, மேரி கோம்.

. * ஒலிம்பிக்கில் பதக்கம் வென்றபோது, இந்தியாவின் தலைப்புச் செய்தியானார். ஒலிம்பிக் குத்துச்சண்டை போட்டியில் பதக்கம் வென்ற முதல் இந்திய வீராங்கனை, மேரி கோம்.

. * 2013-ம் ஆண்டு, ‘அன்பிரேக்கபிள்’ (Unbreakable) என்ற பெயரில், மேரி கோமின் சுயசரிதைப் புத்தகம் வெளியானது. தொடர்ந்து, பாலிவுட் நடிகை ப்ரியங்கா சோப்ரா நடித்த ‘மேரி கோம்’ திரைப்படம் உருவானது.

. * மிகுந்த எதிர்பார்ப்புகளுக்கு இடையில், 2016 ரியோ ஒலிம்பிக் போட்டிக்கு மேரி கோம் தகுதி பெறாதது இந்திய ரசிகர்களுக்கு ஏமாற்றமாக அமைந்தது. “எப்போது ஓய்வு பெறுவீர்கள்?” என்று பத்திரிகையாளர்கள் கேட்டுக்கொண்டே இருந்தாலும், கொஞ்சமும் மனம் தளரவில்லை மேரி.

. * ‘மேரி, இனி உன்னால் ஜெயிக்க முடியாது’ என்றவர்களுக்கு 2018 குத்துச்சண்டை உலக சாம்பியன்ஷிப் பட்டத்தை கைப்பற்றி ‘கம்-பேக்’ கொடுத்தார்.

. * 2020 ஒலிம்பிக்கில் தங்கம் வெல்வதே மேரியின் அடுத்த இலக்கு. “வாழ்க்கை அழுத்தம் நிறைந்தது. அதைக் கையாள கற்றுக்கொள்ள வேண்டும்” என்கிறார் தனக்குரிய புன்னையுடன்.

. * விளையாட்டுத் துறையில் சாதித்துவரும் மேரி கோமை, பத்மஶ்ரீ, பத்மபூஷன், ராஜீவ் காந்தி கேல் ரத்னா என உயரிய விருதுகளால் இந்திய அரசு கௌரவித்துள்ளது.

. * உலகப் புகழ்பெற்ற குத்துச்சண்டை ஜாம்பவன், முகமது அலியின் மகள் லைலா அலியே, மேரி கோமுக்கு இன்ஸ்பிரேஷன். 18 ஆண்டுகளாக விளையாட்டில் ஜெயித்துவரும் மேரி கோம், எப்போதோ இந்தியப் பெண்களின் இன்ஸ்பிரேஷன் ஆகிவிட்டார்.

. * குத்துச்சண்டையில் சாதித்து பல உச்சங்களைத் தொட்ட இவரை, மெக்னிஃபிஷியன்ட் மேரி (Magnificent Mary) என ரசிகர்கள் கொண்டாடுகின்றனர்.

. - கார்த்திகா ராஜேந்திரன்

மேரி கோம்

கார்த்திகா ராஜேந்திரன்Follow