Published:Updated:

ஐ.எஸ்.எல்... மாற்றமா, ஏமாற்றமா?

ஐ.எஸ்.எல்... மாற்றமா, ஏமாற்றமா?
பிரீமியம் ஸ்டோரி
News
ஐ.எஸ்.எல்... மாற்றமா, ஏமாற்றமா?

ஐ.எஸ்.எல்... மாற்றமா, ஏமாற்றமா?

று மாதங்களாக ஓய்வெடுத்த கால்பந்து மைதானங்களில் இப்போது ஓயாமல் விசில் சத்தம் கேட்கத் தொடங்கியுள்ளது. கிரிக்கெட் தேசத்தில் தன் ஐந்தாவது பிறந்தநாளைக் கொண்டாடியிருக்கிறது இந்தியன் சூப்பர் லீக். ப்ரோ கபடி போல் மிகப்பெரிய வெற்றி இல்லை. ஐரோப்பியக் கால்பந்துத் தொடர்களின் தரம் இல்லை. ஆனால், மெதுவாக, நிதானமாகக் காலூன்றிக்கொண்டிருக்கிறது. இந்தத் தொடரின் தயவால் இந்தியா கால்பந்தைப் பார்க்க, ரசிக்க, விளையாடத் தொடங்கியிருக்கிறது. ஆனால், ஓடவேண்டிய நேரத்தில், இந்தியக் கால்பந்தையே மாற்ற வேண்டிய தருணத்தில், ஐ.எஸ்.எல் ஊர்ந்துகொண்டிருப்பதுதான் பெரும் சோகம்!

ஐ.எஸ்.எல்... மாற்றமா, ஏமாற்றமா?

பார்சிலோனா, மான்செஸ்டர் யுனைடட் என ஐரோப்பிய கிளப்களின் ஜெர்ஸிகள் அணிந்துகொண்டு, வீக் எண்டு வந்தால் ஸ்கிரீனிங் போகும் கார்பரேட் கால்பந்து ரசிகர்கள் இப்போது ஜவஹர்லால் நேரு மைதானங்களில் தங்கள் மாநில அணிகளின் பேனர் பிடித்து அமர்ந்திருக்கிறார்கள். வெறும் காலில் வீதிகளிலும் கடற்கரைகளிலும் பந்தை உதைத்துக்கொண்டிருக்கும் சிறுவர்களும் அந்தக் கார்ப்பரேட் ரசிகர்களோடு ஆட்டத்தைக் கொண்டாடிக்கொண்டிருக்கிறார்கள். இப்படி எல்லாத் தரப்பையும் கால்பந்தைக் கொண்டாடவைத்தது ஐ.எஸ்.எல் தொடரின் மிகப்பெரிய வெற்றி. மான்செஸ்டர், மாட்ரிட் நகரங்களில் இருப்பதுபோல் இங்கும் டெர்பி போட்டிகளுக்குப் பெரிய வரவேற்பு ஏற்பட்டுள்ளது. கேரளா பிளாஸ்டர்ஸ் - சென்னையின் எஃப்.சி ஆட்டம், ஐ.எஸ்.எல் தொடரின் ‘கிளாசிகோ’வாக மாறிக்கொண்டிருக்கிறது. 

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
ஐ.எஸ்.எல்... மாற்றமா, ஏமாற்றமா?
ஐ.எஸ்.எல்... மாற்றமா, ஏமாற்றமா?

போட்டிகள் மட்டுமல்லாமல், ப்ராக்டீஸ் செஷன், பிரஸ் மீட் என ரசிகர்கள் அணிகளையும், வீரர்களையும் தொடர்ந்துகொண்டிருக்கிறார்கள். தங்கள் அணி வெளியூரில் விளையாடும் போட்டிகளைப் பார்க்க நூற்றுக்கணக்கில் ரயில் ஏறுகிறது ‘அவே குழு’. பொதுவாக, கால்பந்தில் பார்வையாளர்களுக்கும் ஆதரவாளர்களுக்கும் பெரிய வித்தியாசம் இருக்கிறது. கால்பந்துப் போட்டிகளில் ‘சப்போர்டர்’ என்ற வார்த்தையைத்தான் பயன்படுத்துவார்கள். ‘ஆடியன்ஸ்’ என்ற வார்த்தை அவர்களது அகராதியில் இல்லை. இந்தியாவிலும் பார்வையாளர்களை, ஆதரவாளர்களாக மாற்றிக்கொண்டிருக்கிறது ஐ.எஸ்.எல்! உலக அளவில் இருக்கும் கால்பந்துக் கலாசாரம் இந்தியாவிலும் காலூன்றியிருக்கிறது. இந்திய வீரர்களைப் பாராட்டுகிறார்கள். உள்ளூர் வீரர்களைக் கொண்டாடுகிறார்கள். தனபால் கணேஷ், சீனிவாசன் பாண்டியன் போன்றவர்கள் இப்போதே சென்னையில் ஹீரோக்களாகிவிட்டனர். 

ஐ.எஸ்.எல்... மாற்றமா, ஏமாற்றமா?

கால்பந்து ரசிகர்கள் மத்தியில் பெரும் வரவேற்பைப் பெற்றுள்ள இந்தத் தொடர், இந்திய அணிக்கும் அடையாளம் கொடுத்திருப்பதை மறுக்க முடியாது. முன்பைவிட, இந்தியக் கால்பந்து அணிக்கு ஓரளவு வெளிச்சம் கிடைத்திருக்கிறது. ஜீஜே, அனாஸ், அனிருத் தாபா போன்ற வீரர்களின் எழுச்சி, அதனால் இந்திய அணியின் முன்னேற்றம் என இந்தியன் சூப்பர் லீக் இந்தியக் கால்பந்தில் ஒரு நல்ல அதிர்வலையை ஏற்படுத்தியுள்ளது. ஆனால், ஐந்து ஆண்டுகளில் அது ஏற்படுத்தியிருக்கவேண்டிய தாக்கம் இவ்வளவுதானா? இந்தியக் கால்பந்தின் எதிர்காலம் இதனால் இன்னும் பிரகாசமடையுமா? ஐ.எஸ்.எல் தொடர் ஐ.பி.எல், ப்ரோ கபடியைப் போல் அந்த விளையாட்டில் பெரும் தாக்கத்தை ஏற்படுத்தியுள்ளதா? இதற்கெல்லாம் ‘இல்லை’ என்பதுதான் பதில்! 

ஐ.எஸ்.எல்... மாற்றமா, ஏமாற்றமா?

இன்றைய தேதியில் இந்தியாவின் மிகப்பெரிய விளையாட்டு லீக் - ஐ.பி.எல். இரண்டாவது இடத்தில் ப்ரோ கபடி. அந்த இரண்டு தொடர்களுக்கு வெகுதூரத்தில் நிற்கிறது ஐ.எஸ்.எல்.

தொடரை வணிகரீதியில் பிரபலப்படுத்துவதில் மட்டுமே கவனம் செலுத்திவிட்டு மற்ற விஷயங்களில் கோட்டை விட்டுள்ளது ஐ.எஸ்.எல் நிர்வாகம். ஐ - லீகோடு இணைவது பற்றி எந்தத் தொலைநோக்குத் திட்டமும் இல்லாமல் ஐந்து ஆண்டுகளைக் கடத்தியுள்ளனர். சரி, இந்தத் தொடரையாவது மற்ற தொழில்முறை லீக் போல் நடத்துகிறார்களா என்றால், அதுவும் இல்லை. கால்பந்து லீகை, கிரிக்கெட் தொடர்போல் நடத்திக்கொண்டிருக்கிறார்கள். 

ஐ.எஸ்.எல்... மாற்றமா, ஏமாற்றமா?

சொல்லப்போனால் இப்போதுள்ள ரசிகர்களுக்கே லீகின் தரம் மோசம் என்பது தெரியும். ஆட்டங்கள் அவ்வளவு உயிர்ப்பாக இல்லாவிடினும், கால்பந்துமீதான ஈர்ப்பால் தங்கள் அணிகளை ஆதரித்துக்கொண்டிருக்கிறார்கள். கால்பந்து மீது பெரிதாக ஆர்வமில்லாதவர்களை இந்தத் தொடர் நிச்சயம் ஈர்க்காது. அந்த இடத்தில் ஐ.எஸ்.எல் மிகப்பெரிய தோல்வியைத்தான் சந்தித்துக் கொண்டிருக்கிறது. ஐ.எஸ்.எல் நிர்வாகத்தின் மோசமான அணுகுமுறைக்கு அத்தனை அணிகளும் உதவிக் கொண்டிருக்கின்றன. 

ஐ.எஸ்.எல்... மாற்றமா, ஏமாற்றமா?

ஓர் அணியின் அடையாளம், அதில் விளையாடும் வீரர்கள்தாம். அவர்கள் தொடர்ச்சியாக ஓர் அணிக்கு ஆடும்போதுதான், அந்த அணிக்கும் வீரர்களுக்கும் மதிப்பு கூடும். அந்த அணியுடன் விளையாட்டைத் தாண்டிய ஒரு பிணைப்பு ஏற்படும்.  ஐரோப்பியக் கால்பந்துத் தொடர்கள் வளர்ந்தது அதனால்தான். ஒருசில வீரர்கள் மட்டுமே ஓரிரு ஆண்டுகளில் அணிகள் மாறுவார்கள். மற்றபடி பெரும்பாலான வீரர்கள் ஒரு குறிப்பிட்ட காலத்துக்கு அந்த அணியிலேதான் விளையாடுவார்கள். அது அந்த வீரரின் வளர்ச்சிக்கும் முக்கியம். தொடர்ச்சியாக அணி மாறும்போது, வித்தியாசமான அணுகுமுறைகளுக்குத் தன்னைத் தயார்படுத்த முடியாமல் அவர்கள் காணாமலே போய்விடுவார்கள். உருகுவே நாட்டைச் சேர்ந்த செபாஸ்டியன் அப்ரு,  23 ஆண்டுகளில் 27 கிளப்புகளுக்கு விளையாடியுள்ளார். உருகுவே மக்களுக்கே அவரைத் தெரிந்திருக்க வாய்ப்பில்லை.

இந்தியன் சூப்பர் லீகில் இருக்கும் மோசமான பிரச்னை இது. குறிப்பிட்ட ஒருசில வீரர்களைத் தவிர மற்ற வீரர்கள் ஒவ்வோர் ஆண்டும் வெவ்வேறு அணிக்கு விளையாடிக் கொண்டிருக்கிறார்கள். இன்றைய தேதியில் இந்தியாவின் டாப் வீரர்கள் என்றால் சுனில் சேத்ரி (பெங்களூரு எஃப்.சி), ஜீஜே (சென்னையின் எஃப்.சி), 

ஐ.எஸ்.எல்... மாற்றமா, ஏமாற்றமா?

சந்தேஷ் ஜிங்கன் (கேரளா பிளாஸ்டர்ஸ்) மட்டும்தான். இவர்கள்தான் தொடர்ச்சியாக அந்த அணிகளுக்கு விளையாடிக் கொண்டிருப்பவர்கள். அனாஸ் - இந்தியாவின் சிறந்த சென்டர் பேக் ஆகியிருக்கவேண்டியவர். இந்த மூன்று ஆண்டுகளில் மூன்று அணிகளுக்கு மாறிவிட்டார். அவுட் ஆஃப் ஃபார்ம். அதே நிலைதான் ரினோ ஆன்டோ, கீன் லூயிஸ் போன்றவர்களுக்கும். கீன் லூயிஸ், எப்போதோ இந்திய அணிக்குள் நுழைந்திருக்கவேண்டும். அவரும் மூன்றாண்டுகளாக வெவ்வேறு அணிகளுக்கு ஆடிக்கொண்டிருக்கிறார். இன்னும் இரண்டு ஆண்டுகளுக்கு இந்திய அணி வாய்ப்பு சாத்தியம் இல்லை. 

ஐ.எஸ்.எல்... மாற்றமா, ஏமாற்றமா?

பயிற்சியாளர்களுக்கும் அதேதான். ஒவ்வொரு வருடமும் ஒவ்வொரு பயிற்சியாளரை அணிகள் மாற்றிக்கொண்டிருக்கின்றன. ஐந்து ஆண்டுகளில் ஐந்து பயிற்சியாளர்களை மாற்றியிருக்கிறது டெல்லி டைனமோஸ். மும்பை அணி நான்காவது புதிய பயிற்சியாளரை நியமித்திருக்கிறது. பெங்களூரு எஃப்.சி, சென்னையின் எஃப்.சி தவிர்த்து அனைத்து அணிகளும் இதைத்தான் செய்கின்றன. ஸ்டீவ் காபெல் மூன்று ஆண்டுகள் மூன்று வெவ்வேறு அணிகளுக்குப் பயிற்சியாளராக இருந்திருக்கிறார். இப்படி இருந்தால் ஓர் அணிக்கு எப்படி அடையாளம் கிடைக்கும்? பார்சிலோனா, மான்செஸ்டர் சிட்டி போன்ற அணிகளுக்கு, அவர்களின் ஸ்டைல் ஓர் அடையாளம். அதற்குக் காரணம் பயிற்சியாளர்கள். கடைசிவரை ஐ.எஸ்.எல் அணிகள் புரொஃபஷனல் அணிகளாக மாறப்போவதில்லை.

இவற்றையெல்லாம்விட மிகப்பெரிய கொடுமை, நடுவர்களின் தரம். ஆஃப் சைட் கொடுப்பதில், மஞ்சள் அட்டை கொடுப்பதில், ஃபவுல் விசில்கள் ஊதுவதில் நிச்சயம் ரசிகர்களுக்கே வெறுப்பாகிவிடும். அவ்வளவு மோசமான தரத்தில்தான் ரெஃப்ரிகள் இருக்கிறார்கள். அது ஆட்டத்தின் தரத்தைக் குறைத்துவிடும். ஐந்து ஆண்டுகளாக அதை முன்னேற்றுவது பற்றி ஐ.எஸ்.எல் நிர்வாகம் எந்த முடிவும் எடுக்கவில்லை.
4 ஆண்டுகளாக எந்த வகையிலும் லீகின் தரத்தில் பெரிய முன்னேற்றம் இல்லை. சில அணிகளுக்கு அந்தந்த நகரங்களில் அலுவலகமே இல்லை. அணிகளின் வலைதளங்கள் ஏதோ கல்லூரி விழாவுக்கான வலைதளங்கள் போல் அவ்வளவு மோசமாக இருக்கின்றன. 

ஐ.எஸ்.எல்... மாற்றமா, ஏமாற்றமா?

‘ஒரு நாட்டில் இரண்டு பிரதான லீக் இருந்தால், அனைத்து அணிகளும் தடை செய்யப்படும்’ என்று ஃபிஃபா அறிவித்ததனால் இரண்டு தொடர்களையும் இணைக்கும் திட்டங்கள் இப்போது வேகமெடுத்துள்ளன. மூன்று மாதங்கள் நடந்துகொண்டிருந்த தொடர் இப்போது ஒரு முழு சீசன் நடக்கப்போகிறது. இவை மட்டுமே வரவேற்கத்தகுந்த மாற்றங்கள். ‘மெதுவாகத்தான் தொடரை மாற்றமுடியும்’ என்று வாதிடலாம். ஆனால், ஐந்து ஆண்டுகளில் எவ்வளவோ விஷயங்கள் மாறியிருக்கவேண்டும்.வரும் காலங்களில் அது மாறவேண்டும். மாற்ற முயற்சி செய்யவேண்டும்.

மு.பிரதீப் கிருஷ்ணா - படங்கள் உதவி: ஐ.எஸ்.எல்