உலக டெஸ்ட் சாம்பியன்ஷிப்பின் முதல் இறுதிப்போட்டி 2021 ஆம் ஆண்டு நடந்திருந்தது. அந்த இறுதிப்போட்டியில் நியூசிலாந்து அணியும் இந்திய அணியும் மோதியிருந்தன. அந்தப் போட்டியை வென்று நியூசிலாந்து அணி சாம்பியன் ஆகியிருந்தது. இந்த இறுதிப்போட்டி இங்கிலாந்தின் சவுத்தாம்ப்டனில் வைத்து நடந்திருந்தது. இந்த இறுதிப்போட்டி முடிந்த பிறகு அடுத்த உலக டெஸ்ட் சாம்பியன்ஷிப்புக்கான போட்டிகள் நடந்தன. அவற்றின் முடிவில் புள்ளிகளின் அடிப்படையில் இந்தியாவும் ஆஸ்திரேலியாவும் முதல் இரண்டு இடங்களை பிடிக்கவே டெஸ்ட் சாம்பியன்ஷிப்பின் இறுதிப்போட்டியில் ஆட இரு அணிகளும் தகுதிபெற்றன.

இந்த இறுதிப்போட்டி இங்கிலாந்தின் ஓவல் மைதானத்தில் ஜுன் 7 முதல் 11 வரை நடக்கவிருக்கிறது. 12-ம் தேதி ரிசர்வ் டேவாக அறிவிக்கப்பட்டிருக்கிறது. இந்த போட்டிக்கான இந்திய அணியைத்தான் இப்போது அறிவித்திருக்கிறார்கள்.

இந்த அணியில் ரஹானேவின் பெயரும் இருப்பதுதான் பலருக்கும் ஆச்சர்யத்தையும் மகிழ்ச்சியையும் கொடுத்திருக்கிறது. ரஹானே டெஸ்ட் ஸ்பெஷலிஸ்ட்டாக அறியப்பட்டார். வெளிநாடுகளில் மிகச்சிறப்பாக ஆடினார். கேப்டனாக ஆஸ்திரேலியாவில் பார்டர் கவாஸ்கர் தொடரையெல்லாம் வென்று கொடுத்தார். ஆனால், மோசமான ஃபார்ம் காரணமாக ஒரு கட்டத்தில் அணியிலிருந்தே ஓரங்கட்டப்பட்டார். துணை கேப்டன் பதவி பறிக்கப்பட்டது. ரஹானேவின் கிரிக்கெட் கரியர் என்னவாகப் போகிறது எனும் கேள்வி எழுந்திருந்த நிலையில் திடீரென ஐ.பி.எல் மூலம் சென்னை அணிக்காக மிரட்டலான கம்பேக் கொடுத்தார்.