Published:Updated:

`355 ரன் பார்ட்னர்ஷிப், திருப்பம் தந்த முதல்தர கிரிக்கெட்!' - இந்திய அணி Vs தமிழர் முத்துசாமி

சிறுவயது முதலே கிரிக்கெட்டில் ஆர்வம்காட்டி வந்த முத்துசாமி ஒரு ஆல் ரவுண்டர்.

முத்துசாமி
முத்துசாமி

தென்னாப்பிரிக்காவுக்கு எதிரான முதல் டெஸ்டின் முதல் நாளில் இந்திய அணி விக்கெட் இழப்பின்றி 202 ரன்கள் எடுத்துள்ளது. சிறப்பாக விளையாடிய ரோஹித் ஷர்மா சதம் அடித்து சாதனை படைத்தார். இவருடன் ஓப்பனிங் இறங்கிய மாயங் அகர்வாலும் 84 ரன்கள் எடுக்க இந்திய அணி சிறப்பான நிலையில் உள்ளது. இதற்கிடையியே இந்த டெஸ்டில் ஒரு சுவாரஸ்ய சம்பவம் ஒன்று நிகழ்ந்துள்ளது. இந்திய அணிக்கு எதிராக இன்று அறிமுக வீரராக தென்னாப்பிரிக்க அணியில் ஒருவர் இடம்பிடித்திருந்தார். அவர் பெயர் செனுரான் முத்துசாமி. பெயரை பார்த்த உடனே புரிந்திருக்கும்.

முத்துசாமி
முத்துசாமி

ஆம்... அவர் ஒரு தமிழர். தமிழகத்தைப் பூர்வீகமாகக் கொண்ட முத்துசாமி சென்னையில் இருந்து 300 கி.மீ தள்ளி இருக்கும் நாகப்பட்டினத்தைச் சேர்ந்தவர். இரண்டு தலைமுறைகளுக்கு முன்பு தென்னாப்பிரிக்காவுக்கு குடிபெயர்ந்துள்ளது இவர்களின் குடும்பம். 25 வயதாகும் முத்துசாமி தமிழகத்தைப் பூர்வீகமாகக் கொண்டாலும் பிறந்தது டர்பன் நகரின் அருகே உள்ள வெஸ்ட்வில்லே பகுதியில். சிறுவயது முதலே கிரிக்கெட்டில் ஆர்வம்காட்டி வந்த முத்துசாமி ஒரு ஆல் ரவுண்டர்.

திருப்பம் தந்த முதல்தர கிரிக்கெட்!

இடது கை பேட்ஸ்மேன் மற்றும் ஸ்பின் பௌலரான இவர் தென்னாப்பிரிக்காவில் நடைபெற்ற முதல்தர போட்டிகளில் பங்கேற்றுவந்தார். இரண்டு வருடங்களுக்கு முன்பு தென்னாப்பிரிக்காவின் லிஸ்ட் ஏ அணியான டால்பின்ஸ் அணிக்காக விளையாடியபோது இவருக்குத் திருப்புமுனை ஏற்பட்டது. டெஸ்ட் போட்டியான அதில் இரண்டாவது களமிறங்கிய முத்துசாமி, மற்றொரு வீரருடன் பார்ட்னர்ஷிப் சேர்ந்து இரண்டாவது விக்கெட்டுக்கு 355 ரன்கள் குவித்தனர். தென்னாப்பிரிக்கா லிஸ்ட் ஏ கேரியரில் இந்த ரன்கள் இதுவரை தகர்க்க முடியாத சாதனையாக இருக்கிறது. இந்தப் போட்டியில் முத்துசாமி 181 ரன்கள் குவிக்க தேர்வுக் குழுவின் பார்வை விழத் தொடங்கியது.

முத்துசாமி
முத்துசாமி

121 போட்டிகளில் விளையாடி 3,000 ரன்னுக்கு மேல் குவித்தும், 129 விக்கெட்களையும் வீழ்த்தி தொடர்ந்து உள்ளூர் போட்டிகளில் சிறப்பாக விளையாடவே, தற்போது இந்தியாவுக்கு எதிரான போட்டியில் அறிமுக வீரராக களமிறங்கியுள்ளார். இன்று தொடங்கியுள்ள டெஸ்ட் போட்டிக்குமுன் நடைபெற்ற பயிற்சிப் போட்டியில் முத்துசாமிக்கு பேட்டிங் செய்யும் வாய்ப்பு கிடைக்கவில்லை என்றாலும் ஒரே ஒரு ஓவர் பௌலிங் செய்தார். அதிலும் ஒரே ஒரு விக்கெட் எடுக்க தற்போது அணியில் இடம்பிடித்துள்ளார்.

``எங்களது வேர் சென்னையில் இருந்து வந்தது. நாகப்பட்டினத்தில் இன்னும் உறவினர்கள் இருக்கிறார்கள். பல தலைமுறைகள் கடந்துவிட்டாலும் எனது குடும்பத்துக்கு இந்தியாவுடனான தொடர்பு இன்னும் இருக்கின்றன. அதற்கு முக்கிய காரணம் நமது கலாசாரம்தான். நான் தென்னாப்பிரிக்க அணிக்காகத் தேர்வு செய்யப்பட்டுள்ளேன் எனத் தெரிந்ததும் என் பெற்றோர்கள் அடைந்த மகிழ்ச்சிக்கு அளவில்லை.

முத்துசாமி
முத்துசாமி

அதுவும்இந்திய அணிக்கு எதிராக அறிமுகம் என்றதும் அவர்களுக்கு வார்த்தைகள் வரவில்லை. டர்பனில் இன்னும் அதிகமான இந்திய மக்கள் இருக்கிறார்கள். என் குடும்பத்தில் சிலர் தமிழ் பேசுகிறார்கள். ஆனால், துரதிர்ஷ்டவசமாக நான் கற்றுக்கொள்ளவில்லை. இப்போதுதான் தமிழ் மொழியை மெது மெதுவாகக் கற்றுவருகிறேன். அதேநேரம் கோயிலுக்குச் செல்வது யோகா செய்வது என இந்திய கலாசாரத்தில்தான் வாழ்ந்து வருகிறோம்" எனத் தனது பூர்வீகம் குறித்து முத்துசாமி பிடிஐ தளத்துக்குப் பேசியுள்ளார்.