ராயல் சேலஞ்சர்ஸ் பெங்களூர் மற்றும் சன்ரைசர்ஸ் ஹைதராபாத் அணிகளுக்கிடையேயான போட்டி ஹைதராபாத்தில் உள்ள ராஜிவ் காந்தி மைதானத்தில் நேற்று நடைபெற்றது. இந்தப் போட்டியின் டாஸின் போது சன்ரைசர்ஸ் அணியின் கேப்டன் எய்டன் மார்க்ரம் பேசிய சில விஷயங்கள் பரபரப்பைக் கிளப்பியிருக்கின்றன.

"உம்ரான் மாலிக் ஒரு தனித்துவம் வாய்ந்த வீரர். அவரால் 150 கி.மீ வேகத்தில் பந்துவீச முடியும். ஆனால், அவர் விஷயத்தில் திரைமறைவில் என்ன நடக்கிறது என்பது எனக்கு தெரியவில்லை!" எனக் கூறினார்.

"'திரைமறைவில் என்ன நடக்கிறது என்பது தெரியவில்லை..." என ஒரு அணியின் கேப்டனே சொல்வது நிச்சயமாக பிரச்னைக்குரிய விஷயம்தான். மேலும், உம்ரான் மாலிக் ஆடவைக்கப்படாததிலும் எனக்குப் பல குழப்பங்கள் இருக்கின்றன!" எனத் தனது ட்விட்டர் பக்கத்தில் இந்த சம்பவம் சார்ந்து தன் கருத்தைப் பகிர்ந்திருக்கிறார்.

கேப்டனுக்கும் நிர்வாகத்துக்கும் முரண்பாடுகள் ஏற்படுவது சன்ரைசர்ஸூக்கு ஒன்றும் புதிய விஷயமில்லை. ஆனால், ஒவ்வொரு சீசனிலும் அதே விஷயம் மீண்டும் மீண்டும் நிகழ்வதுதான் வேதனைக்குரிய விஷயம்.