Published:Updated:

PAK v AUS: ஹசன் அலியின் கேட்ச் ட்ராப் மட்டும்தான் பிரச்சனையா? பாகிஸ்தான் கோட்டைவிட்ட அந்த ஒரு ஓவர்!

ஒட்டுமொத்த விகடனுக்கும் ஒரே ஷார்ட்கட்

Use App
பாபர் அசாம் & ரிஸ்வான்
பாபர் அசாம் & ரிஸ்வான் ( Pakistan Cricket )

பிளான் B இல்லாமல் அஃப்ரிடி சொதப்பியிருக்கிறார். இக்கட்டான கட்டத்தில் தவறான ஃபீல்ட் செட்டப் மூலமும் யுக்திகள் மூலமும் கேப்டன் பாபர் அசாம் சொதப்பியிருக்கிறார். ஆனால், பழி மட்டும் ஹசன் அலியின் பெயரில்?

டி20 உலகக்கோப்பையின் பரபரப்பான அரையிறுதி ஆட்டம் நடந்து முடிந்திருக்கிறது. ஆஸ்திரேலியா மற்றும் பாகிஸ்தான் அணிகள் மோதிய இந்த ஆட்டத்தில் ஆஸ்திரேலிய அணி 5 விக்கெட் வித்தியாசத்தில் வென்று இறுதிப்போட்டிக்கு தகுதிப்பெற்றிருக்கிறது.

ஷஹீன் அஃப்ரிடி வீசிய 19-வது ஓவரில் மட்டும் ஆஸ்திரேலிய அணி 22 ரன்களை எடுத்திருந்தது. அந்த ஓவரோடு போட்டியும் முடிந்துவிட்டது. மேத்யூ வேட் அந்த ஓவரில் ஹாட்ரிக் சிக்சர்களை பறக்கவிட்டிருந்தார். இந்த சிக்சர்களுக்கு முன்பாக ஹசன் அலி, மிட் விக்கெட்டில் மேத்யூ வேட் கேட்ச்சை ட்ராப் செய்திருப்பார்.

இந்த ஒரு கேட்ச் ட்ராப்தான் தோல்விக்கு முழுக்க முழுக்க காரணம் என ரசிகர்கள் ஹசன் அலி மீது பாய்ந்து கொண்டிருக்கின்றனர். போதாக்குறைக்கு பாகிஸ்தான் கேப்டன் பாபர் அசாமும் அந்த ஒரு கேட்ச் ட்ராப்தான் போட்டியையே மாற்றியது என பத்திரிகையாளர் சந்திப்பில் ஹசன் அலி மீது மொத்த பழியையும் ஏற்றி வைத்திருக்கிறார். உண்மையிலேயே அந்த ஒரு கேட்ச் ட்ராப் மட்டும்தான் பிரச்னையா? அதைப் பார்ப்பதற்கு முன்பு நேற்றை போட்டியின் கதைச்சுருக்கத்தை பார்த்துவிடுவோம்.
பாகிஸ்தான் அணி
பாகிஸ்தான் அணி
Pakistan Cricket

ஆஸ்திரேலிய அணியின் கேப்டன் ஆரோன் ஃபின்ச் டாஸை வென்று சேஸிங்கை தேர்வு செய்திருந்தார். ஆஸ்திரேலிய அணிக்கு அதுவே முதல் வெற்றியாக பார்க்கப்பட்டது. ஏனெனில், இந்த தொடரில் துபாயில் இதற்கு முன் நடந்திருந்த 11 போட்டிகளில் 10 போட்டிகளில் ஸ்கோரை சேஸ் செய்த அணியே போட்டியை வென்றிருக்கிறது.

வழக்கம்போல, பாகிஸ்தான் அணி சிறப்பாகவே பேட்டிங்கைத் தொடங்கியது. பாபர் அசாமும் ரிஸ்வானும் இந்தப் போட்டியிலும் நல்ல பார்ட்னர்ஷிப் அமைத்திருந்தனர். 10 ஓவர்களில் 71 ரன்களை இந்தக் கூட்டணி எடுத்திருந்தது. பாபர் அசாம் 34 பந்துகளில் 39 ரன்களை எடுத்திருந்த நிலையில் ஆடம் ஷம்பாவின் பந்துவீச்சில் அவுட் ஆனார்.

கடைசி 10 ஓவர்களில் ரிஸ்வான் கொஞ்சம் வேகமெடுத்தார். 52 பந்துகளில் 67 ரன்களையெடுத்து ஸ்டார்க்கின் ஓவரில் ஸ்மித்திடம் கேட்ச் ஆனார்.ஃபகர் ஷமான் ஒரு அட்டகாசமான இன்னிங்ஸை ஆடியிருந்தார். சூப்பர் 12 சுற்றின் 5 போட்டிகளிலும் மொத்தமாக சேர்த்தே 54 ரன்களை மட்டுமே ஃபகர் ஷமான் எடுத்திருந்தார். ஆனால், நேற்று மட்டும் 32 பந்துகளில் 55 ரன்களை எடுத்து நாட் அவுட்டாக இருந்தார். இவர்களின் சிறப்பான ஆட்டத்தால் பாகிஸ்தான் அணி 20 ஓவர்கள் முடிவில் 176 ரன்களை எடுத்தது.

ஆஸ்திரேலியாவிற்கு 177 ரன்கள் டார்கெட். முதல் ஓவரிலேயே ஃபின்ச்சை அவுட்டாக்கி ஷஹீன் அஃப்ரிடி அதிர்ச்சி கொடுத்தாலும், அந்த சரிவிலிருந்து ஆஸ்திரேலிய அணி மெதுமெதுவாக மீண்டது. குறிப்பாக, டேவிட் வார்னர் மிகச்சிறப்பாக ஆடினார். 49 ரன்களில் ஷதாப் கானின் கூக்ளியில் கீப்பரிடம் கேட்ச் ஆகி வெளியேறினார். அந்த பந்து எட்ஜ்ஜே ஆகவில்லை என்பது ரீப்ளேயில் தெரிந்தது. டேவிட் வார்னர் ரிவியூ எடுக்காமல் நடையைக்கட்டியது ஆச்சர்யமே!

வார்னருக்குப் பிறகு துவண்டு போயிருந்த ஆஸ்திரேலியாவை ஸ்டாய்னிஸ் - மேத்யூ வேட் கூட்டணி மீட்டது. இருவரும் 81 ரன்கள் பார்ட்னர்ஷிப் அமைத்தனர். கடைசி 2 ஓவர்களில் 22 ரன்கள் தேவை என்ற நிலையில், அஃப்ரிடி வீசிய 19-வது ஓவரிலேயே ஹாட்ரிக் சிக்சர்களை அடித்து மேத்யூ வேட் மேட்ச்சை முடித்து வைத்தார்.

ஸ்டாய்னிஸ் & வேட்
ஸ்டாய்னிஸ் & வேட்
Cricket.com. au

மேட்ச்சை மாற்றிய அந்த ஒரு ஓவர்!

கடைசி 2 ஓவர்களில் ஆஸ்திரேலிய அணியின் வெற்றிக்கு 22 ரன்கள் தேவை என்ற சூழல் இருந்தது. இந்த சமயத்தில், பாகிஸ்தான் அணியின் கேப்டன் பாபர் அசாமுக்கு 19 வது ஓவரை வீச வைக்க மூன்று ஆப்சன்கள் இருந்தது. இமாத் வசிம், ஹரிஸ் ராஃப், ஷஹீன் அஃப்ரிடி. இந்த மூன்று பேரில் ஷஹீன் அஃப்ரிடியை பாபர் அசாம் அழைக்கிறார். இது நல்ல முடிவே! பாகிஸ்தான் அணியின் அபாயகரமான பௌலர் அஃப்ரிடியே. மேலும், நேற்றைய போட்டியில் அதற்கு முன் 3 ஓவர்களை வீசி 13 ரன்களை மட்டுமே கொடுத்து ஒரு விக்கெட்டையும் வீழ்த்தியிருந்தார். ஆக, அஃப்ரிடி 19 வது ஓவரை வீசினால், கட்டுக்கோப்பாக வீசி கடைசி ஓவர் வீசும் பௌலரின் நெருக்கடையைக் குறைப்பார் என்பதே திட்டம். இந்த முடிவில் விமர்சனம் செய்ய எதுவுமில்லை. இடதுகை ஸ்பின்னரான இமாத் வசிமை விடவும், நேற்றைய போட்டியில் சுமாராக வீசியிருக்கும் ராஃபை விடவும் அந்த ஓவரை வீச அஃப்ரிடி 100% சரியானவரே. ஆனால், அவர் வீசிய விதம்? அங்கேதான் பிரச்னை.

பவர்ப்ளேயில் ஸ்விங்கை பிரதானமாக நம்பி வீசும் அஃப்ரிடி, டெத் ஓவர்களில் யார்க்கர்களை முழுமையாக நம்புபவர். ஆனால், நேற்று அந்த யார்க்கர்கள்தான் அஃப்ரிடிக்கு வினையாக அமைந்திருந்தது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

17 பந்துகளில் 41 ரன்களை எடுத்திருந்த மேத்யூ வேட். அஃப்ரிடிக்கு எதிராக 7 பந்துகளை சந்தித்திருந்தார். இந்த 7 பந்துகளில் 22 ரன்களை எடுத்திருந்தார். இந்த 7 பந்துகளை இரண்டு பகுதிகளாக பிரிக்கலாம். அஃப்ரிடி வீசிய 15 வது ஓவரில் வேட் 3 பந்துகளை எதிர்கொண்டு 2 ரன்களை மட்டுமே சேர்த்திருந்தார். அதேநேரத்தில், 19 வது ஓவரில் 4 பந்துகளை எதிர்கொண்டு மூன்று சிக்சர்களோடு 20 ரன்களை சேர்த்திருந்தார். 15 வது ஓவரில் அஃப்ரிடி வீசிய விதத்திற்கும் 19 ஓவரில் அஃப்ரிடி வீசிய விதத்திற்கும் இடைப்பட்ட வேறுபாடே வெற்றி தோல்வியை தீர்மானித்தது.

15 வது ஓவரில் வேட் சந்தித்த முதல் பந்து ஃபுல் லெந்துக்கு கொஞ்சம் மேலாக பிட்ச் ஆகி ஆங்கிள் இன் டெலிவரியாக்ச் வந்திருக்கும். அதை லெக் சைடில் சிங்கிள் தட்டியிருந்தார். வேட் மீண்டும் ஸ்ட்ரைக்கிற்கு வந்த போது அதேமாதிரியே ஒரு குட் லெந்த் டெலிவரியையே அஃப்ரிடியிடமிருந்து எதிர்பார்த்தார். அதை அட்டாக் செய்ய க்ரீஸை விட்டு இறங்கியும் வந்தார். ஆனால் அஃப்ரிடி வீசியது ஒரு ஷார்ட் பிட்ச் டெலிவரி. இதை எதிர்பார்க்காத வேட் 'பீட்டன்' ஆனார். அடுத்து மூன்றாவது பந்து ஒரு யார்க்கர். அதை தட்டிவிட்டு சிங்கிள் எடுத்திருந்தார்.

15 வது ஓவரில் வேட் எதிர்கொண்ட மூன்று பந்துகளும் மூன்று வெவ்வேறு லெந்த்தில் மூன்று வேரியேஷன்களில் வீசப்பட்டவை. மூன்றுமே unpredictable!
மேத்யூ வேட்
மேத்யூ வேட்
Hotstar

ஆனால், அஃப்ரிடி வீசிய 19 வது ஓவரில் அவர் வீச நினைத்ததெல்லாம் யார்க்கர் மட்டுமே. அதையும் அவர் நினைத்தை போல் வீசவில்லை. வேட் நினைத்தை போன்றே வீசினார்.

துபாய் மைதானம் ஒரு பக்கம் பெரிதாகவும் ஒரு பக்கம் அதைவிட கொஞ்சம் சிறிதாகவும் இருக்கும். ஒரு 10 மீ வித்தியாசம் என எடுத்துக் கொள்ளலாம். மேத்யூ வேட் 19 வது ஓவரில் க்ரீஸில் நின்ற போது அவரின் லெக் சைட் பவுண்டரி பெரிதாக இருந்தது. இதை குறி வைத்தே ஃபீல்ட் செட்டப்பும் செய்யப்பட்டிருந்தது. டீப் ஸ்கொயர் லெக், டீப் மிட் விக்கெட் வைக்கப்பட்டிருந்தது. லாங் ஆன், லாங் ஆஃப் வைக்கப்பட்டிருந்தது. ஃபைன் லெக்கும், தேர்டு மேனும் வட்டத்திற்குள் இருந்தனர். ஆஃப் சைடில் டீப் பாயிண்ட் மட்டுமே வைக்கப்பட்டிருந்தது.

இந்த ஃபீல்டுக்கு ஏற்றவாறு மிடில் & லெக் ஸ்டம்பில் யார்க்கர்களை வீசி வேடை லெக் சைடுக்குள்ளேயே கட்டுப்படுத்த எண்ணினர்.

19 வது ஓவரில் மூன்றாவது பந்தை வேடுக்கு வீசினார் அஃப்ரிடி . யார்க்கர்தான் அது லெக் ஸ்டம்ப் லைனில் வைடாக அமைந்தது. இதன் மூலமே பாகிஸ்தானின் திட்டத்தை உணர முடியும். அடுத்த பந்துதான் போட்டியையே மாற்றிய பந்து. அந்த பந்தில் அஃப்ரிடி மீண்டும் யார்க்கருக்கு முயல்கிறார். ஆனால், சரியாக விழாமல் பந்து ஸ்லாட்டில் விழுகிறது. வேட் அதை மடக்கி லெக் சைடில் தூக்கியடிக்கிறார். டீப் மிட் விக்கெட்டிலிருந்த ஹசன் அலி ஓடி வந்து அந்த கேட்ச்சை ட்ராப் செய்தார். அந்த நொடியில் அது எவ்வளவு பெரிய பேரிழப்பாக அமையப்போகிறது என்பதை யாரும் உணர்ந்திருக்கவில்லை.

வேட் அதற்குள் இரண்டு ரன்களை ஓடி மீண்டும் ஸ்ட்ரைக்கிற்கு வருகிறார். அவர் சந்தித்த அடுத்த மூன்று பந்துகள் முக்கியமானவை. அப்படியே நில்லுங்கள்! கொஞ்சம் ரீவைண்ட் செய்து குட்டி ஃப்ளாஸ்பேக்.

ஃபீல்ட் செட்டப்பை நினைவுப்படுத்தி பாருங்கள். ஃபைன் லெக்கும் தேர்டு மேனும் வட்டத்திற்குள் இருக்கிறார்கள்.

இந்த ஓவரில் வேட் சந்தித்த முதல் பந்தே லெக் ஸ்டம்ப் லைனில் யார்க்காரக வீசப்பட்டு ஒயிடாகியிருந்ததே! அந்த பந்தை அஃப்ரிடி வீசி முடித்த உடனேயே ரேம்ப் ஷாட் ஆடுவதற்காக வேட் ஷேடோ ப்ராக்டிஸ் செய்து பார்த்திருப்பார். இந்த பந்து மட்டும் கொஞ்சம் சரியான லைனில் வந்திருந்தால் எப்படி ஆடியிருக்க வேண்டும் என்பதற்கான ஒத்திகை அது. ஏனெனில், லெக் சைடில் பவுண்டரி தூரமாக இருக்கிறது. லாங் ஆன்/ ஆஃபில் பீல்டர்கள் இருக்கிறார்கள். எளிதாக பவுண்டரி அடிக்க ஒரே வழி ஃபைன் லெக்கே.

அந்த பந்து வீசப்பட்ட போது கமெண்ட்ரியில் பேசிக்கொண்டிருந்த இயான் பிஷப்

ரவி சாஸ்திரி ரிப்போர்ட் கார்டு: கோப்பைகள் இல்லை, மீம் மெட்டீரியல் - இவை மட்டுமா இவரின் அடையாளங்கள்?
இந்த பந்து மட்டும் பேட்டில் பட்டிருந்தால் ஷார்ட் ஃபைன் லெக்கை பீட் செய்து பவுண்டரியாகியிருக்கும். ரிஸ்வான் ஃபீல்ட் செட்டப்பை மாற்ற சொல்வது போல் தெரிகிறது
இயான் பிஷப்

அடுத்த பந்து ஸ்லாட்டில் விழ ஹசன் அலி கேட்ச் ட்ராப் செய்திருப்பார். துல்லியமான யார்க்கராக வீசினால் நிச்சயமாக வேடால் அடிக்க முடியாது என அஃப்ரிடி மீண்டும் யார்க்கருக்கு முயல்கிறார். அது ஃபுல் லென்த்தில் வசதியாக விழ, வேட் ஒத்திகை பார்த்த அந்த ரேம்ப் ஷாட்டை கச்சிதமாக ஆடி ஃபைன் லெக்கில் சிக்சராக்கினார்.

இந்த லென்த்தில் அடிபட்ட அஃப்ரிடி, யார்க்கர் டெலிவரியை கைவிட்டு வேகத்தை குறைத்து ஒரு கட்டரை வீசினார். அதுவும் ஏறக்குறைய ஸ்லாட்டிலேயே விழுந்தது. அதை மடக்கி லெக் சைடில் பெரிய சிக்சராக்கினார். இந்த லென்த்தில் அடிபட்டதால், இப்போது அஃப்ரிடி மீண்டும் யார்க்கருக்கே முயன்றார். ஆனால், அது ஃபுல் டாஸாக மாறி விட, மீண்டும் ஒரு ரேம்ப் ஷாட். மீண்டும் ஃபைன் லெக்கில் ஒரு சிக்சர். அவ்வளவுதான் மேட்ச் முடிந்தது. ஆஸ்திரேலியா வெற்றி!

ஹசன் அலி
ஹசன் அலி
Twitter

ஒட்டுமொத்த பழியும் அந்த ஒரு கேட்ச்சை ட்ராப் செய்த ஹசன் அலி மீது போடப்பட்டுள்ளது. ஆனால், நடந்தது என்ன? அஃப்ரிடியால் தான் நினைத்ததை அங்கே கொஞ்சமும் செயல்படுத்த முடியவில்லை. அவர் யார்க்கர் வீச முயன்றார். ஆனால், ஒரு யார்க்கர் கூட சரியாக விழவில்லை. அதைவிட ஃபீல்ட் செட்டப். வேட் ஃபைன் லெகில் ஒரு சிக்சரை அடித்த பிறகும், ஃபீல்ட் செட்டப் மாறவே இல்லை. ஷார்ட் ஃபைன் லெக் அப்படியே இருந்தது. அந்த முதல் ரேம்ப் ஷாட்டிற்கு பிறகு ஃபைன் லெக் டீப்பாக சென்றிருந்தால், மீண்டும் அந்த ஷாட்டை அடிக்கும் எண்ணமே வேடிற்கு ஏற்பட்டிருக்காது. லெக் சைடில் அடிப்பதற்கு முயன்றிருப்பார். அது மீண்டும் ஒரு கேட்ச் வாய்ப்பை வழங்கியிருக்கூடும். அஃப்ரிடியும் வேரியேஷனுக்காக ஒரு ஷார்ட் பாலை வீசும் வாய்ப்பும் கிடைத்திருக்கக்கூடும். போட்டி கடைசி ஓவர் வரை கூட சென்றிருக்கும். ஆனால், அடிபட்ட பிறகும் அந்த ஃபீல்டிங் மாற்றம் நடைபெறவே இல்லை. வேட் அடித்த 41 ரன்ளுமே லெக் சைடில் வந்தவையே. ரன்களை தாண்டி ஆஃப் சைடில் ஒரு பந்தை கூட வேட் தட்டி கூட விட்டிருக்கவில்லை. வேடை ஆஃப் சைடில் ஆட வைத்திருந்தால் விக்கெட்டுக்கான வாய்ப்பு அதிகமாகியிருக்கும்.

ப்ளான் B இல்லாமல் அஃப்ரிடி சொதப்பியிருக்கிறார். இக்கட்டான கட்டத்தில் தவறான ஃபீல்ட் செட்டப் மூலமும் யுக்திகள் மூலமும் கேப்டன் பாபர் அசாம் சொதப்பியிருக்கிறார். ஆனால், பழி மட்டும் ஹசன் அலியின் பெயரில்?

இந்த ஒரு போட்டியின் சில பகுதிகளை தவிர்த்துவிட்டு பார்த்தால் பாகிஸ்தான் அணி இந்த தொடரில் மற்ற அணிகளை பயங்கர ஆதிக்கத்தோடு ஆடியிருக்கிறது. இந்த உத்வேகத்தை தக்க வைத்துக் கொண்டு தொடர்ச்சியாக சிறப்பாக செயல்படுவது பாகிஸ்தானுக்கு மட்டுமில்லை. உலக கிரிக்கெட்டுக்கே நல்லது.

இறுதிப்போட்டியில் நியூசிலாந்து அணியை ஆஸ்திரேலியா அணி எதிர்கொள்ளவிருக்கிறது. இரண்டு அணிகளுமே இதுவரை டி20 உலகக்கோப்பையை வென்றதில்லை என்பதால் இந்த முறை ஒரு புதிய சாம்பியன் உருவெடுக்கப்போகிறார்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு