Published:Updated:

உலகக்கோப்பைக்கான இந்திய அணி... குழப்பங்களும் கேள்விகளும்!

உலகக்கோப்பைக்கான இந்திய அணி... குழப்பங்களும் கேள்விகளும்!
பிரீமியம் ஸ்டோரி
News
உலகக்கோப்பைக்கான இந்திய அணி... குழப்பங்களும் கேள்விகளும்!

உலகக்கோப்பைக்கான இந்திய அணி... குழப்பங்களும் கேள்விகளும்!

ந்த ஐபிஎல் தொடர் தொடங்குவதற்கு முன்பு ஆஸ்திரேலியாவுக்கு எதிரான ஒருநாள் போட்டியில் இந்திய அணி 3-2 என்ற கணக்கில் தோல்வியைத் தழுவியது. உலகக் கோப்பை நெருங்கும் வேளையில் இந்திய அணியின் இந்தத் தோல்வி, பல்வேறு தரப்பினரிடையே விமர்சனங்களை எழுப்பியது. “இது உலகக் கோப்பை அணிக்கு நாங்கள் செய்து பார்க்கும் சோதனை முயற்சி” என்று ரவி சாஸ்திரி சொன்னாலும், பத்து வருடங்களுக்குப் பிறகு இந்தியா சொந்த மண்ணில் தொடரை இழந்ததை யாராலும் ஏற்றுக்கொள்ளமுடியவில்லை. ஆனால் ஆஸ்திரேலியா அணி இந்தியா வருவதற்கு முன்பு, அதன் நிலைமையே வேறு!

உலகக்கோப்பைக்கான இந்திய அணி... குழப்பங்களும் கேள்விகளும்!

“பேபீஸ்னு ஸ்டார் ஸ்போர்ட்ஸ் நிறுவனம் ஷேவாக்கை வச்சு கலாச்சு, அத ஹேடன் கண்டிச்சு கடைசில டி20, ஒருநாள் தொடரை இழந்து ஒரே அசிங்கமாப் போச்சு குமாரு” என்பதுபோல் ஆகிவிட்டது. இந்நிலையில், உலகக் கோப்பைக்குப் போகும் முன் இந்திய அணியில் ஆயிரம் ஆயிரம் குழப்பங்கள் நிலவிக்கொண்டிருக்கிறது.

அவுட் ஆஃப் பார்ம் ஓப்பனர்ஸ்!


ஷிகர் தவான் மற்றும் ரோகித் சர்மா, ஆஸ்திரேலியாவுக்கு எதிரான நான்காவது ஒருநாள் போட்டியைத் தவிர, மற்ற ஒருநாள் போட்டிகளில் அவ்வளவு சிறப்பாக ஆடவில்லை. கடந்த சில ஆண்டுகளாகவே முதல் 3 பேட்ஸ்மேன்களின் ரன்கள் தான் எப்போதும் இந்திய அணிக்கு ஒரு பெரிய பலமாக இருந்துள்ளது. ஆனால், ஓப்பனர்கள் இப்படி சொதப்புவது அணிக்கு ஆகாது. இன்னமும் ஒரு தரமான நான்காவது டவுன் பேட்ஸ்மேனையும் இந்திய அணி கண்டுபிடிக்காத நிலையில், உலகக்கோப்பைக்கு முன்னர் ஓப்பனர்கள் அவுட் ஆஃப் பார்மில் இருப்பது மிகப்பெரிய கவலை!

ராகுல் இருப்பாரா?

காபி சர்ச்சைக்குப் பிறகு, சர்வதேச கிரிக்கெட்டுக்கு திரும்பிய ராகுல், ஆஸ்திரேலியாவுக்கு எதிரான டி20 போட்டிகளில் 50, 47 என சிறப்பாகவே விளையாடினார். இருந்தாலும் அவரை ஆஸ்திரேலியாவுக்கு எதிரான 4-வது ஒருநாள் போட்டியில் மூன்றாவது வீரராகக் களமிறக்கி சோதித்துப் பார்க்க, அந்தப் போட்டியில் 26 ரன்கள் மட்டுமே எடுத்தார் ராகுல். நெருக்கடி இல்லாத டி20 போட்டிகளில் சிறப்பாகச் செயல்பட்டாலும், ஒருநாள், டெஸ்ட் போன்ற லாங் ஃபார்மட் ஆட்டங்களுக்கு அவரை நம்பமுடிவதில்லை. ஐபிஎல்-லும் சொதப்பிக்கொண்டுதான் இருக்கிறார் ராகுல்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
உலகக்கோப்பைக்கான இந்திய அணி... குழப்பங்களும் கேள்விகளும்!

சரி யாரு அந்த 4வது ஆளு?

2015 உலகக் கோப்பைக்குப் பிறகு நான்காவது டவுனில் பல வீரர்களை இறக்கிப்பார்த்த இந்திய அணிக்கு சரியான விடை இதுவரை கிடைக்கவேயில்லை. கடந்த 10 மாதங்களாக ராயுடுவைத்தான் களமிறக்கினார்கள். ஆஸ்திரேலிய தொடருக்கு முன்னால், 55 போட்டிகளில் 47.05 என்ற சராசரி கொண்டிருந்தார் ராயுடு. அணியில் செட்டாகிவிட்டார் என்று நினைத்தபோது ஆஸ்திரேலிய தொடரில் சொதப்பிவிட்டார். மூன்று மோசமான இன்னிங்ஸ் (13,18,2) அவரை கடைசி 2 ஆட்டங்களுக்கான அணியில் இருந்து வெளியேற்றி விட்டது. 

தினேஷ் கார்த்திக் - ரிஷப் பன்ட் யார் சரியா வருவா?

கடைசி இரண்டு ஒருநாள் போட்டி வரைக்கும் உலகக்கோப்பைக்கான இந்திய அணியில் ரிஷப் பன்ட்டையே இரண்டாவது விக்கெட் கீப்பராக நினைத்த அணி நிர்வாகம், இப்போது சற்று குழப்பமடைந்துள்ளது. மொகாலியில் அவர் ஆடிய இன்னிங்ஸ் சிறப்பாக இருந்தாலும் (24 பந்துகளில் 36 ரன்கள்) டர்னரை ஸ்டெம்பிங் மூலம் அவுட் ஆக்கும் வாய்ப்பை நழுவவிட்டார். அதுமட்டுமல்லாமல் பல்வேறு தருணங்களிலும் அவரது கீப்பிங் சுமாராகவே இருந்தது. அடுத்து டெல்லி  போட்டியில் 4-ம் நிலை வீரராக களிமிறங்கிய ரிஷப் பன்ட் 16 ரன்கள் எடுத்து சொதப்பினார். இந்நிலையில், அந்தத் தொடருக்கே தினேஷ் கார்த்திக்கை தேர்வு செய்யாதது, கூடுதல் குழப்பத்தை ஏற்படுத்துகிறது. கடைசி இரண்டு போட்டிகளை மட்டும் வைத்து பன்ட்டைக் கணக்கிடலாமா, இல்லை அனுபவம் உள்ள தினேஷ் கார்த்திக்கை உலகக்கோப்பைக்கான அணியில் சேர்க்கலாமா? ஐபிஎல் தொடர் பதிலைக் கொடுக்கலாம். 

விஜய் சங்கர் மற்றும் ஜடேஜா!


விஜய் சங்கருடைய பேட்டிங் சிறப்பாக இருந்தாலும், அவருடைய பெளலிங் அவ்வளவு சிறப்பாக இல்லை என்றுதான் சொல்லவேண்டும். வேகம், வேரியேஷன் எதுவும் பெரிதாக இல்லை. நாக்பூர் போட்டியில் சிறப்பாகப் பந்துவீசி கடைசி கட்டத்தில் இந்தியாவுக்கு வெற்றியைத் தேடி தந்தாலும், அடுத்த இரண்டு ஒருநாள் போட்டியிலும் எந்த விக்கெட்டும் எடுக்கவில்லை. அதேசமயம், ஜடேஜா பேட்டிங்கில் சொதப்பினாலும் ஃபீல்டிங்கில் கில்லியா இருக்கிறார். பெளலிங்கிலும் ஓரளவு சிறப்பாகப் பந்து வீசுகிறார். விக்கெட் எடுக்கிறாரோ இல்லையோ ரன்களைக் கட்டுப்படுத்துகிறார். 2013 சாம்பியன்ஸ் டிராபியில் சிறந்த பௌலருக்கான விருதைப் பெற்றார். அவரது அனுபவம் நிச்சயம் அணிக்குக் கைகொடுக்கும். ஆனால், விஜய் சங்கரின் சமீபத்திய பேட்டிங் பெர்ஃபாமன்ஸ், இவர்களுக்குள்ளும் போட்டியை அதிகப்படுத்தியுள்ளது. 

உலகக்கோப்பைக்கான இந்திய அணி... குழப்பங்களும் கேள்விகளும்!

ஃபாஸ்ட் பெளலர்ஸ்...

இந்திய அணியின் வேகப்பந்துவீச்சாளர்கள்தான் இந்த உலக கோப்பை வெற்றிக்கு முக்கிய துருப்புச் சீட்டாக இருப்பார்கள் என்றே சொல்லலாம். இங்கிலாந்து மாதிரியான ஸ்விங்க்குக்கு சாதகமான பிட்சுகளில் புவனேஷ்வர் குமாரின் பங்கு அளப்பறியது. அதுமட்டுமல்லாமல், உலகின் நம்பர் ஒன் பெளலர் பும்ரா டெத் பெளலிங் ஸ்பெஷலிஸ்ட். எந்த நேரத்திலும் ஆட்டத்தின் போக்கையே மாற்றக்கூடிய திறமை உள்ளவர். முகமது ஷமி பழைய பந்தை ரிவர்ஸ் ஸ்விங் செய்வதில் கெட்டிகாரர். இவர்கள் மூவரும் இந்திய அணியின் முக்கிய ட்ரம்ப் கார்டுகள். ஆனால், இந்திய அணியின் காம்பினேஷன்தான் அடுத்த கேள்வியை எழுப்புகிறது. மூன்று வேகப்பந்துவீச்சாளர்களைக் களமிறக்கினால், நிச்சயம் ஒரு பேக் அப் பௌலர் வேண்டும். அந்த இடத்துக்கு சரியான ஒரு ஆப்ஷன் கூட இந்திய அணியிடம் இல்லை.

உமேஷ் யாதவ், கலீல் அஹமது, முகமது சிராஜ், சித்தார்த் கௌல் என யாருமே ஒருநாள் போட்டிகளில் சிறப்பாகச் செயல்படவில்லை. உலகக் கோப்பை தொடரில் அவர்களிடம் எந்தப் பெரிய பங்களிப்பையும் எதிர்பார்க்க முடியாது. அவர்களுள் உமேஷ் யாதவை வேண்டுமானால் பரிசீலிக்கலாம். ஆனால், அவரையும் சரியாகக் கணிக்க முடியவில்லை. ஐபிஎல் போட்டிகளிலும் சொதப்புகிறார். தொடர்ந்து போட்டிகளில் விளையாடிக்கொண்டிருக்கும் அந்த மூன்று முக்கிய பௌலர்களில் ஒருவருக்குக் காயம் ஏற்பட்டாலும், அது இந்திய அணியின் வெற்றியில் மிகப்பெரிய தாக்கத்தை ஏற்படுத்தும்.

இத்தனை கேள்விகளுக்கும் இந்திய அணி பதில் கண்டுபிடிக்கவேண்டும். ஏப்ரல் 23-ம் தேதிக்குள் உலகக் கோப்பைக்கான அணியை தேர்வு செய்யவேண்டும். இடையே எந்த சர்வதேசப் போட்டிகளும் இல்லை. ஐபிஎல் தொடர் மட்டும்தான் நடந்து கொண்டிருக்கிறது. ஐபிஎல் சாதனைகள்தான் வீரர்களின் உலகக்கோப்பைக்கான வாய்ப்பை உறுதிசெய்யப்போகிறது.

தி.குமரன்