Published:Updated:

`33 ஆண்டுகளுக்கு முந்தைய மாடல் சீருடை’ - ரெட்ரோ ஜெர்ஸியில் களமிறங்கும் ஆஸ்திரேலியா!

`33 ஆண்டுகளுக்கு முந்தைய மாடல் சீருடை’ - ரெட்ரோ ஜெர்ஸியில் களமிறங்கும் ஆஸ்திரேலியா!
`33 ஆண்டுகளுக்கு முந்தைய மாடல் சீருடை’ - ரெட்ரோ ஜெர்ஸியில் களமிறங்கும் ஆஸ்திரேலியா!

இந்திய அணிக்கெதிரான ஒருநாள் தொடரில் ஆஸ்திரேலியா அணி வீரர்கள், அந்த அணி கடந்த 1980களில் பயன்படுத்திய ஜெர்ஸியைப் போன்ற சீருடையை அணிந்து விளையாட இருக்கின்றனர். 

Photo Credit: Twitter/@cricketcomau

இந்தியா - ஆஸ்திரேலிய அணிகள் இடையிலான டி20 மற்றும் டெஸ்ட் தொடர்கள் நிறைவடைந்திருக்கும் நிலையில், ஒருநாள் தொடர் சிட்னியில் வரும் 12-ம் தேதி தொடங்குகிறது. டி20 தொடர் சமனில் முடிந்தநிலையில், டெஸ்ட் தொடரில் வெற்றிபெற்று ஆஸ்திரேலிய மண்ணில் முதன்முறையாக டெஸ்ட் தொடரை வென்று சாதித்தது. டெஸ்ட் தொடரை இழந்திருக்கும் ஆஸ்திரேலிய அணி, ஒருநாள் தொடரைக் கைப்பற்றும் முனைப்பில் களமிறங்குகிறது. 

Photo Credit: sportingnews.com

இந்திய அணிக்கெதிரான ஒருநாள் தொடரில் களமிறங்கும் ஆஸ்திரேலிய வீரர்கள், அந்த அணி கடந்த 1980களில் பயன்படுத்திய ஜெர்ஸியைப் போன்று வடிவமைக்கப்பட்ட சீருடைகளை அணிந்து விளையாட இருக்கிறது. இந்தத் தகவலை ஆஸ்திரேலியக் கிரிக்கெட் வாரியம் உறுதிப்படுத்தியிருக்கிறது. 1986-ம் ஆண்டு நடைபெற்ற இந்திய அணிக்கெதிரான ஒருநாள் தொடரை ஆலன் பார்டர் தலைமையிலான ஆஸ்திரேலிய அணி வென்றது. அந்தத் தொடரில் விளையாடிய ஆஸ்திரேலிய வீரர்கள் அணிந்த அதே மாடல் ஜெர்ஸியுடன் தற்போதைய ஆஸ்திரேலிய அணி களமிறங்குகிறது. 

Photo Credit: Twitter/@cricketcomau

இதுகுறித்துப் பேசிய ஆஸ்திரேலிய அணியின் வேகப்பந்து வீச்சாளர் பீட்டர் சிடில், ``33 ஆண்டுகளுக்கு முந்தைய ஆஸ்திரேலிய அணி வீரர்கள் அணிந்ததுபோன்ற ஜெர்ஸியை அணிந்து ஒருநாள் போட்டிகளில் களமிறங்குவது மிகப்பெரிய கௌரவம். இது வீரர்கள் அனைவருக்கும் மகிழ்ச்சியைக் கொடுத்திருக்கிறது’’ என்றார். ஏறக்குறைய 8 ஆண்டுகள் கழித்து ஆஸ்திரேலியாவுக்காக சர்வதேச ஒருநாள் போட்டிகளில் பங்கேற்பது குறித்து மகிழ்ச்சி தெரிவித்துள்ள சிடில், `ஆஸ்திரேலிய அணிக்காக மீண்டும் களமிறங்குவோம் என்று நினைத்துக்கூடப் பார்த்ததில்லை. முதல் ஒருநாள் போட்டியில் விளையாடும் இளம் வீரருக்கான மகிழ்ச்சியுடன் நான் களமிறங்க இருக்கிறேன்’ என்றார். கடந்த 2010-ம் ஆண்டு நவம்பருக்குப் பின்னர் ஆஸ்திரேலிய ஒருநாள் அணியில் பீட்டர் சிடில் இடம்பெறவில்லை என்பது குறிப்பிடத்தக்கது.