Published:Updated:

வளர்ச்சியா? வீழ்ச்சியா? ரவி சாஸ்திரி என்ன செய்துகொண்டிருக்கிறார்?

ஒட்டுமொத்த விகடனுக்கும் ஒரே ஷார்ட்கட்

Use App
வளர்ச்சியா? வீழ்ச்சியா? ரவி சாஸ்திரி என்ன செய்துகொண்டிருக்கிறார்?
வளர்ச்சியா? வீழ்ச்சியா? ரவி சாஸ்திரி என்ன செய்துகொண்டிருக்கிறார்?

வளர்ச்சியா? வீழ்ச்சியா? ரவி சாஸ்திரி என்ன செய்துகொண்டிருக்கிறார்?

பிரீமியம் ஸ்டோரி

"இங்கிலாந்தில் விளையாடியது கிரிக்கெட்டின் வேறு  ஃபார்மட். அங்கும் நாங்கள் மிகச்சிறப்பாகவே விளையாடினோம். 4-1 என்ற நம்பர் எங்கள் அணியினர் போராடிய விதத்தை முழுமையாகச் சொல்லாது" - ஆசிய கோப்பை வென்றதும், இங்கிலாந்து தொடரைப் பற்றி பெருமையாகத் தம்பட்டம் அடித்தார் இந்திய பயிற்சியாளர் ரவி சாஸ்திரி. 'கடந்த 15 ஆண்டுகளில் இதுதான் இந்தியாவின் சிறந்த அணி' என இங்கிலாந்தில் பெருமையடித்தார். தோற்கும்போதும் தடுமாறும் போதும்கூட பெருமை பேசுவது எவ்வளவு மோசமானது. அதிலும் அந்த ஆட்டிட்யூடை மொத்த அணிக்குள்ளும் கடத்தி வைத்திருக்கும்போது..! ஒன்று மட்டும் தைரியமாகச் சொல்லலாம்... இந்திய அணி மிகமோசமாக கிரிக்கெட்டை அணுகிக்கொண்டிருக்கிறது.

6 அணிகள் விளையாடிய ஒரு ஒருநாள் போட்டித் தொடர் முடிந்ததும், என்றோ முடிந்துபோன ஒரு தொடரைப் பற்றி ஏன் பேசவேண்டும். தங்களை விட மிகவும் பலம் குறைவான அணிகளை வென்றதற்காகப் பெருமைப்பட முடியாது. வங்கதேசத்தை வீழ்த்திவிட்டோம் என்று கர்வப்பட முடியாது. அதனால் இங்கிலாந்து தொடர் பற்றிப் பேசுகிறார். ரோஹித் எவ்வளவு கூலாக அணியை வழிநடத்தினார் என்று பேசுகிறார். ஃபீல்டிங் மற்றும் மிடில் ஓவர் பௌலிங் சிறப்பாக இருந்தது என்று பெருமிதப்படுகிறார். இந்திய அணியின் பயிற்சியாளர் பேசுவதற்கு இவ்வளவு விஷயங்கள்தான் இருந்ததா... இந்திய அணியில் பிரச்னைகள் என்று எதுவுமே இல்லையா?

வளர்ச்சியா? வீழ்ச்சியா? ரவி சாஸ்திரி என்ன செய்துகொண்டிருக்கிறார்?

ஆட்டம் காணும் மிடில் ஆர்டர்!

உலகக் கோப்பைக்கு இன்னும் 7 மாதங்கள்தான் இருக்கிறது. இந்திய அணியின் மிடில் ஆர்டரில் விளையாடப்போவது யாரென்று தெரியவில்லை. இரண்டு ஆண்டுகளாக மனீஷ் பாண்டே, தினேஷ் கார்த்திக், ஷ்ரேயாஸ் ஐயர், அம்பாதி ராயுடு, கே.எல்.ராகுல் என்று பலரையும் பரிசோதித்துவிட்டனர். ஆனால், இன்னும் இந்தியா தடுமாறிக்கொண்டே இருக்கிறது. இந்த ஆசியக் கோப்பையில் இந்தியாவின் நம்பர் 5,6,7 பேட்ஸ்மேன்களின் சராசரி வெறும் 24.57! ஆப்கானிஸ்தானுக்கு எதிராகவும் சரி, வங்கதேசத்துக்கு எதிரான ஃபைனலிலும் சரி, 200+ இலக்கை சேஸ் செய்வதற்கே இந்திய மிடில் ஆர்டர் இந்த ஆட்டம் போடுகிறது. அதை எப்படி சரிசெய்வது என்று இந்திய அணியின் பயிற்சியாளர் என்றாவது சிந்தித்திருக்கிறாரா தெரியவில்லை.

வேகப்பந்து வீச்சாளர்கள் எங்கே?!

பும்ரா, புவனேஷ்வர் குமார் தாண்டி, அணியில் நிரந்தரமாக விளையாடப்போகும் வேகப்பந்துவீச்சாளர் யார்? இரண்டு ஸ்பின்னர்களோடு களமிறங்க முடிவு செய்துவிட்டதால் இன்னும் மூன்றாவது வேகப்பந்துவீச்சாளரை அடையாளம் காணாமலேயே இருக்கிறார்கள். சித்தார்த் கௌல், உமேஷ் யாதவ், ஷர்துல் தாக்கூர் தாண்டி இப்போது கலீல் அஹமது, தீபக் சஹார் என சோதனை செய்துகொண்டே இருக்கிறார்கள்.

நாங்கதான் கெத்து!

‘நாங்கள்தான்' என்ற மனப்பான்மை இந்திய வீரர்களுக்குள் ஆழமாகப் பதிந்துவிட்டது போலத்தான் தெரிகிறது. ரவி சாஸ்திரி சொல்வதற்கெல்லாம் தவறாமல் தலையசைக்கிறார் கேப்டன் விராட் கோலி. அவரும் அதே மைண்ட் செட்டில்தான் ஒவ்வொரு பிரஸ் மீட்டிலும் பேசுகிறார். இங்கிலாந்து தொடரின் தொடக்கத்தில், "டீம் செலக்ஷனில் நான் எடுத்த முடிவு தவறாகிவிட்டது" என்று ஓப்பன் ஸ்டேட்மென்ட் கொடுத்தவர், தொடர் முடிவில் பத்திரிகையாளர்களிடம் வேறு மாதிரி பேசுகிறார். தவறுகளை ஏற்றுக் கொள்ளும்போதுதான் அதை சரிசெய்ய முடியும். இவர்கள் அதை ஏற்றுக்கொள்ளவே தயாராக இல்லை. பிறகு எப்படி மிடில் ஆர்டர், ஃபாஸ்ட் பௌலிங் சிக்கல்களைச் சரிசெய்யப்போகிறார்கள். கடைசி வரை தாங்கள் செய்தது சரியென்றேதான் இந்தக் கூட்டணி வாதிடும்.

வளர்ச்சியா? வீழ்ச்சியா? ரவி சாஸ்திரி என்ன செய்துகொண்டிருக்கிறார்?

சாஸ்திரியின் தாக்கம்!

சாஸ்திரியின் தாக்கம் கோலியோடு மட்டும் முடிந்துவிடவில்லை. முன்னாள் கேப்டன் தோனி, துணைக் கேப்டன் ரோஹித் என அணி மொத்தமும் அது பரவிக்கிடக்கிறது. அதன் உச்சம், எதிர்த்து விளையாடும் கத்துக்குட்டி அணிகளை கொஞ்சம்கூட மதிப்பதில்லை.

எப்போதும் கத்துக்குட்டி அணிகளுக்கு எதிரான போட்டிக்கு முன்பு அந்த கேப்டன் சொல்வார்கள் : ‘‘We respect them and we are not taking them lightly’’. அது வெறும் டெம்ப்ளேட் வசனம்தான். ஆட்டத்தில் தெரிந்துவிடும், உண்மையிலேயே அந்த அணி, அந்தக் கத்துக்குட்டியை மதித்ததா என்று. இந்தியா இந்த ஆசியக் கோப்பையில் எந்தக் கத்துக்குட்டி அணியையும் மதிக்கவில்லை என்பதே உண்மை.

ஆப்கானிஸ்தானுக்கு எதிரானப் போட்டியில் முகமது ஷாசாத் அதிரடியாக ஆட, கொஞ்சம் ஆட்டம் கண்ட கேப்டன் தோனி, 12-வது ஓவரிலேயே ஆறாவது பந்துவீச்சாளரைப் பயன்படுத்தினார். இத்தனைக்கும் அந்த அணி 11 ஓவர்களில் 64 ரன்களே எடுத்திருந்தது. ஆனால் விக்கெட் ஏதும் விழவில்லை. இதை இந்திய அணியால் ஏற்றுக்கொள்ள முடியவில்லை. அதே இடத்தில், இங்கிலாந்து, தென்னாப்பிரிக்க ஓப்பனர்கள் இருந்திருந்தால் 3 பௌலர்களுக்கு மேல் இந்தியா பயன்படுத்தியிருக்காது. ஏனெனில், அவர்கள் அடிக்கக்கூடியவர்கள். அடிக்கலாம். ஆனால், ஆப்கானிஸ்தான் எப்படி? ஷாசாத்தை எதிர்கொள்ள இந்திய அணியிடம் எந்தத் திட்டமும் இல்லை. அதனால்தான் சஹார், கலீல், கௌல், குல்தீப், ஜடேஜா, ஜாதவ் என அத்தனை பேரையும் உடனுக்குடன் மாற்றிக்கொண்டே இருந்தார் தோனி. ஷாசாத்தின் பலவீனம் தெரிந்திருந்தால், அதற்கு ஏற்ற பௌலரை வைத்து அதைப் பயன்படுத்த முயற்சி செய்திருக்கலாம். நமக்கு அதுதான் தெரியவில்லையே. நாம் உலகிலேயே சிறந்த அணி வேறு. ஆப்கானிஸ்தானுக் கெல்லாம் திட்டம் தீட்ட முடியுமா?

 ஆப்கனுக்கெதிரான போட்டியில் ஷாசாத் நன்றாக ஆடிக்கொண்டிருக்கு ம்போது ரோஹித்தின் முகம் அப்படிச் சுருங்கியிருந்தது. இந்தப் போட்டியில் வெல்ல வேண்டும் என்பதைவிட, இந்த அணியிடம் எல்லாம் தோற்றுவிடக்கூடாது என்ற மனநிலையே ஓங்கியிருந்தது. அதனால்தான் ஆட்டத்தை கடைசிப் பந்து வரை எடுத்துச்செல்லவேண்டி இருந்தது. மற்ற அணிகளுக்குத் தருவதுபோல் உண்மையான மரியாதை கொடுத்திருந்தால், இந்த இந்திய அணிக்கு 253 பெரிய இலக்காகவே இருந்திருக்காது.

ஆப்கானிஸ்தான் போட்டிக்குப் பிறகு சித்தார்த் கௌல், கலீல் அஹமது, தீபக் சஹார் அடங்கிய புது வேகப்பந்துக் கூட்டணியைக் குறை சொல்லிய தோனி, 60 ரன்கள் மட்டுமே எடுத்த மிடில் ஆர்டர் பற்றிப் பேசவில்லை. ஃபைனல் முடிந்ததும் பேசிய ரோஹித் ‘‘ஒட்டுமொத்த தொடரிலும் ஆதிக்கம் செலுத்தியதற்கான பரிசு இது’’ என்று பெருமிதம் கொண்டார். கடைசி இரண்டு போட்டிகளிலும் இந்தியா எத்தனை ஓவர்களில் ஆதிக்கம் செலுத்தியது என்று ரோஹித்துக்கும் சாஸ்திரிக்கும் மட்டுமே தெரிந்திருக்கக்கூடும்!

வளர்ச்சியா? வீழ்ச்சியா? ரவி சாஸ்திரி என்ன செய்துகொண்டிருக்கிறார்?

யார் பொறுப்பு!

இந்திய கிரிக்கெட்டில் அணியின் குறைகளை பயிற்சியாளார்கள் வெளிப்படையாக வெளியில் சொல்லிவிடமுடியாதுதான். இங்கு வீரர்களுக்குத்தான் முக்கியத்துவம். ஆனால், குறைந்தபட்சம் பிரச்னை இருக்கிறது என்பதையாவது ஒப்புக்கொள்ளலாம். அதையெல்லாம் விட்டுவிட்டு ‘நாங்கள் நன்றாகத்தான் விளையாடினோம்', ‘இதற்கு முந்தைய இந்திய அணிகள் இப்படிப் போராடவில்லை' என்று பேசிக்கொண்டிருப்பது அணியைப் பின்நோக்கித்தான் அழைத்துச் செல்லும்.

இப்படி தவறுகளை ஏற்றுக்கொள்ள மறுத்துக்கொண்டே இருக்க, சாம்பியன்ஸ் டிராபி ஃபைனல் போல, 2015 உலகக் கோப்பை அரையிறுதி போல, 2019 உலகக்கோப்பையில் ஒரு தோல்வி இந்தியாவை வெளியேற்றும்.

அப்போதும்கூட ‘‘இதுவரை எங்களைப் போல் எந்த அணியும் விளையாடவில்லை. திஸ் இஸ் ஒன் பேட் டே’’ என்றுதான் கேப்டனும் பயிற்சியாளரும் சொல்வார்கள். நிச்சயம் அதுபோன்ற ஒரு சூழல் வரும், ஆனால் அங்கு இந்தியாவின் தோல்விக்கு பின்னால் அந்த ஒரு மோசமான நாள் நிற்கப்போவதில்லை. அங்கு நிற்கப்போவது - 15 வருடங்களில் சிறந்த இந்திய அணியை உருவாக்கியதாகச் சொன்ன ரவி சாஸ்திரி மட்டுமே!

- மு.பிரதீப் கிருஷ்ணா

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு