வெல்கம் 2019 - விளையாட்டு

இந்தியாவின் முதல் ‘ப்ரோ வாலிபால் லீக்’ தொடர், ஃபிப்ரவரி 2019-ல் நடத்தத் திட்டமிடப்பட்டுள்ளது. 

2019 உலகக் கோப்பை கிரிக்கெட் போட்டி, இங்கிலாந்தில் மே 30 - ஜூலை 14 வரை நடைபெறுகிறது. இதில், 10 அணிகள் கலந்துகொள்கின்றன.

ஏப்ரல் அல்லது மே மாதத்தில் இந்தியப் பொதுத்தேர்தல் நடக்கவிருப்பதால், 2019 ஐ.பி.எல் தொடரை மார்ச் மாதமே நடத்துகிறது, இந்திய கிரிக்கெட் கட்டுப்பாட்டு வாரியம்.

செப்டம்பர் 20-ம் தேதி, ரக்பி உலகக் கோப்பை ஜப்பானில் தொடங்கவுள்ளது. இந்தத் தொடரில் 20 அணிகள் கலந்துகொள்கின்றன.

2019 ஃபிஃபா மகளிர் உலகக் கோப்பை தொடர், ஜூன் 7 - ஜூலை 7 வரை பிரான்ஸ் நாட்டில் நடக்கிறது. இதில், 24 அணிகள் கலந்துகொள்கின்றன.

ஏப்ரல் 21 - 28 வரை ‘உலக டேபிள் டென்னிஸ் சாம்பியன்ஷிப்’ தொடர், ஹங்கேரி தலைநகர் புடாபெஸ்டில் நடக்கவுள்ளது.

2019-ம் ஆண்டு, ஒற்றையர் கிராண்ட் ஸ்லாம் பட்டம் வென்றால், 15 ஒற்றையர் கிராண்ட் ஸ்லாம் பட்டம் என்ற மைல்கல்லை எட்டுவார், நோவாக் ஜோகோவிச்.

யுவன்டஸ் அணிக்காக விளையாடும் கிறிஸ்டியானோ ரொனால்டோ, சாம்பியன்ஸ் லீக் கோப்பை வென்றால்,  3 அணிகளில் சாம்பியன்ஸ் லீக் வென்ற வீரர் என்ற சாதனையைப் படைப்பார்.

ஆசியாவின் பெரிய கால்பந்து தொடரான ‘ஏ.எஃப்.சி ஆசிய கோப்பை’, ஜனவரி 5-ம் தேதி தொடங்குகிறது. பஹ்ரைன், தாய்லாந்து, ஐக்கிய அரபு அமீரகம் அணிகளுடன் ‘ஏ’ பிரிவில் இடம்பெற்றுள்ளது இந்தியா.

2019 ஐ.பி.எல் தொடரில் களம் இறங்கினால், ‘இளம் ஐ.பி.எல் வீரர்’ சாதனையைப் படைப்பார், 16 வயது, பிரயாஸ் ரே பர்மான். ஆப்கானிஸ்தான் வீரரான முஜூப் உர் ரஹ்மானின் சாதனையை முறியடிப்பார்.

மு.பிரதீப் கிருஷ்ணா