லண்டன்: ஒலிம்பிக் மகளிர் கால்பந்து போட்டியில் அமெரிக்கா தங்கம் வென்றது. இதன்மூலம் தொடர்ச்சியாக 3 ஒலிம்பிக் போட்டிகளில் தங்கம் வென்று சாதனை படைத்துள்ளது அமெரிக்க அணி. கடைசி 5 ஒலிம்பிக் போட்டிகளில் அமெரிக்க அணி வென்றுள்ள 4-வது தங்கப் பதக்கம் இது.
வியாழக்கிழமை நடைபெற்ற இறுதி ஆட்டத்தில் அமெரிக்கா 2-1 என்ற கணக்கில் ஜப்பானை வீழ்த்தியது. இதனால் ஜப்பானுக்கு வெள்ளிப் பதக்கம் கிடைத்தது.
அமெரிக்க வீராங்கனை கார்லி லாய்ட் இரு கோல்களை அடித்து அமெரிக்க அணிக்கு வெற்றி தேடித்தந்தார். வெம்ப்ளே மைதானத்தில் நடைபெற்ற இந்த ஆட்டம் தொடக்கம் முதலே விறுவிறுப்பாக இருந்தது. இரு அணிகளுமே அபாரமாக ஆடினாலும், ஆட்டத்தின் 8-வது நிமிடத்திலேயே அமெரிக்காவின் கார்லி லாய்ட் கோலடித்தார். இதனால் முதல் பாதி ஆட்டநேர முடிவில் அமெரிக்கா 1-0 என்ற கணக்கில் முன்னிலை பெற்றது.
இரண்டாவது பாதி ஆட்டத்தில் அமெரிக்காவுக்கு மேலும் ஓர் கோல் கிடைத்தது.
58-வது நிமிடத்தில் கிடைத்த இந்தக் கோலையும் லாய்ட்டே அடித்தார். அடுத்த 5-வது நிமிடத்தில் (63-வது நிமிடம்) ஜப்பானின் யூகி ஒஜிமி கோலடித்தார்.
இருப்பினும் ஜப்பானின் தோல்வி தவிர்க்க முடியாததானது. இறுதியில் அமெரிக்கா 2-1 என்ற கணக்கில் ஜப்பானை வீழ்த்தி வெற்றி கண்டது.
இந்த வெற்றியின் மூலம் உலகக் கோப்பை இறுதிப் போட்டியில் ஜப்பானிடம் கண்ட தோல்விக்கு பழிதீர்த்துக் கொண்டது அமெரிக்கா. உலகக் கோப்பை போட்டியில் ஜப்பானுக்கு எதிரான இறுதி ஆட்டத்தில் பெனால்டி வாய்ப்பை வீணடித்த லாய்ட், இந்த முறை இரு கோல் அடித்து அமெரிக்காவுக்கு வெற்றி தேடித்தந்து ஆறுதல் தேடிக்கொண்டார். கனடா அணி வெண்கலப் பதக்கம் வென்றது.
அமெரிக்க அணி தங்கம் வென்றதற்கு, அமெரிக்க அதிபர் ஒபாமா வாழ்த்து தெரிவித்துள்ளார்.
